Ijtimoiy tarmoqlarda Sirdaryo viloyati Oqoltin tumanidagi 9-maktab o‘qituvchilari maktab direktori tomonidan majburiy mehnatga jalb qilingani haqida xabar tarqaldi. Bandlik va mehnat munosabatlari vazirligi bunga munosabat bildirdi.
Qayd etilishicha, ushbu holat Sirdaryo viloyati Bandlik bosh boshqarmasi davlat mehnat inspeksiyasi tomonidan o‘rganib chiqildi. O‘rganish natijasida Sirdaryo viloyati, Oqoltin tumanidagi 9-sonli maktab direktori o‘qituvchilarni maktab hovlisi va atrofiga tozalash ishlariga majburiy tarzda jalb etgani aniqlandi.
Mazkur holat bo‘yicha Oqoltin tumanidagi 9-maktab direktoriga nisbatan Ma’muriy javobgarlik to‘g‘risidagi kodeksning 51-moddasi 1-qismiga asosan bazaviy hisoblash miqdorining 50 barobari (12 million 250 ming so‘m) miqdorida ma’muriy jarima qo‘llanildi.
Bundan avval Qashqadaryoda o‘qituvchilarni majburiy mehnatga jalb qilgan direktor ishdan olingani haqida xabar berilgan edi.
Izoh (0)