Qashqadaryo viloyatining Chiroqchi tumanida profilaktika inspektoriga faol qarshilik ko‘rsatib, qonuniy talablarini bajarmasdan uning egnidagi xizmat kiyimini tortib yirtgan fuqaroga nisbatan jinoyat ishi qo‘zg‘atildi. Bu haqda viloyat IIB matbuot xizmati xabar berdi.
Ma’lum qilinishicha, 28-avgust kuni soat 11:00 larda Chiroqchi tumani IIB 4-sonli IIB XPG profilaktika inspektoriga bozorga kelgan “Mirzato‘p” MFYda yashovchi fuqaro X.J. qo‘ng‘iroq qilib, Chiroqchi tumani Mirzato‘p qishlog‘ida joylashgan, haftaning har shanba kuni bo‘ladigan “Uyshun” dehqon bozorida ikkita fuqaro o‘zaro janjallashayotganini aytib, murojaat qilgan.
Shundan so‘ng ushbu bozorda xizmat olib borayotgan hududiy profilaktika inspektori holat bo‘layotgan joyga borganida B.D. fuqaro O.B. bilan o‘zaro og‘zaki tortishib janjallashib, B.D. janjal vaqtida O.B.ning yuziga urib tan jarohati yetkazgan.
Ushbu bozorda profilaktik ishlarni olib borayotgan profilaktika inspektori janjallashayotgan fuqarolarning oldiga borib, ularni tinchlantirmoqchi bo‘lganida O.B. profilaktika inspektoriga faol qarshilik ko‘rsatib, profilaktika inspektorining qonuniy talabiga bo‘ysunmasdan, uni haqorat qilib, egnidagi xizmat kiyimini tortib yirtib, tan jarohati yetkazgan.
Holat yuzasidan fuqaro O.B. mastlik bo‘yicha tibbiy tekshiruvdan o‘tkazilganida mast bo‘lgani aniqlangan.
Mazkur holat yuzasidan Chiroqchi tumani prokuraturasi tomonidan O.B.ga nisbatan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 2-qismi bilan jinoyat ishi qo‘zg‘atilib, ushlangan. Ayni paytda Chiroqchi tuman prokraturasi tomonidan dastlabki tergov harakatlari olib borilmoqda.
Izoh (0)