Tomoshabinlar ekran yuzini ko‘rishni intiqlik bilan kutayotgan, turk kinosanoati vakillari tomonidan ishlangan tarixiy seriallar haqida ma’lumot berib o‘tamiz.
“Mavlono”
Serial 1207-yilda tavallud topgan Jaloliddin Rumiy haqida hikoya qiladi. Mavlono bolaligidanoq otasidan falsafiy va diniy ta’lim oladi. Bog‘dodni tark etishga majbur bo‘lgan otasi keyinroq Konyaga boradi. Rumiyning hayoti asosida tasvirga olinayotgan tarixiy serial 2021-yilning sentabrida efir yuzini ko‘radi.
“Aka-uka Barbarosslar”
Turkiya tarixidagi eng qimmat budjetga ega serial bo‘lishi kutilayotgan serialda Engin Altan Dezyatan va Ulash Tuna Astepe suratga tushmoqda. Mazkur loyiha Usmonli imperiyasining tashkil topishidagi ahamiyatli shaxs Hayriddin Barbarossa haqida hikoya qiladi. Serialda bosh qahramonni gavdalantiradigan Engin Altan “Ertug‘rul: Tirilish”gi ijrosi bilan muxlislarga yaxshi tanish. Ulash Tuna Astepe esa “So‘yla Qora dengiz” serialida Tohir rolini gavdalantirgan. Yangi loyihaning muvaffaqiyatli chiqishi va tomoshabinlar qalbidan joy olishi kutilmoqda.
“Afsona”
Serial IX asrda yuz bergan voqealarni o‘zida mujassam etadi. Sujet nochor oilaning qizi va xon oilasining o‘g‘lining o‘rtasidagi munosabatlarga asoslangan. Unga ko‘ra ota-onasidan erta ayrilgan qiz kun ko‘rish uchun ko‘p va og‘ir mehnat qilishiga to‘g‘ri keladi. Xonning o‘g‘li esa nogiron bo‘ladi. Qo‘lida muammo bo‘lgani hisobiga u otasiga voris bo‘la olmaydi. Ushbu hikoya bilan parallel ravishda serialda bir qator tarixiy hodisalar ham ko‘rsatiladi. Muxlislar yangi loyihada “Muhtasham yuz yil”da Nigor xalfani va Sumbul og‘ani gavdalantirgan Filiz Ahmet hamda Selim Bayraktarni ko‘rishi mumkin bo‘ladi.
“Alp Arslon”
Barish Arduch va Fahriye Evjen bosh qahramonni gavdalantiradigan mazkur serial “Uyg‘onish: Buyuk Saljuqiy”ga prikvel (voqealari avvalroq suratga olingan kino yoki serialdagi voqealardan oldin sodir bo‘lgan) bo‘ladi. Unda Saljuqiylar davridan avvalroq yuz bergan voqea va hodisalar ko‘rsatiladi. Loyiha premyerasi 2021-yilning sentabriga mo‘ljallangan.
Izoh (0)