Томошабинлар экран юзини кўришни интиқлик билан кутаётган, турк киносаноати вакиллари томонидан ишланган тарихий сериаллар ҳақида маълумот бериб ўтамиз.
«Мавлоно»
Сериал 1207 йилда таваллуд топган Жалолиддин Румий ҳақида ҳикоя қилади. Мавлоно болалигиданоқ отасидан фалсафий ва диний таълим олади. Боғдодни тарк этишга мажбур бўлган отаси кейинроқ Коняга боради. Румийнинг ҳаёти асосида тасвирга олинаётган тарихий сериал 2021 йилнинг сентябрида эфир юзини кўради.
«Ака-ука Барбаросслар»
Туркия тарихидаги энг қиммат бюджетга эга сериал бўлиши кутилаётган сериалда Энгин Алтан Дезятан ва Улаш Туна Астепе суратга тушмоқда. Мазкур лойиҳа Усмонли империясининг ташкил топишидаги аҳамиятли шахс Ҳайриддин Барбаросса ҳақида ҳикоя қилади. Сериалда бош қаҳрамонни гавдалантирадиган Энгин Алтан «Эртуғрул: Тирилиш»ги ижроси билан мухлисларга яхши таниш. Улаш Туна Астепе эса «Сўйла Қора денгиз» сериалида Тоҳир ролини гавдалантирган. Янги лойиҳанинг муваффақиятли чиқиши ва томошабинлар қалбидан жой олиши кутилмоқда.
«Афсона»
Сериал IX асрда юз берган воқеаларни ўзида мужассам этади. Сюжет ночор оиланинг қизи ва хон оиласининг ўғлининг ўртасидаги муносабатларга асосланган. Унга кўра ота-онасидан эрта айрилган қиз кун кўриш учун кўп ва оғир меҳнат қилишига тўғри келади. Хоннинг ўғли эса ногирон бўлади. Қўлида муаммо бўлгани ҳисобига у отасига ворис бўла олмайди. Ушбу ҳикоя билан параллел равишда сериалда бир қатор тарихий ҳодисалар ҳам кўрсатилади. Мухлислар янги лойиҳада «Муҳташам юз йил»да Нигор халфани ва Сумбул оғани гавдалантирган Филиз Аҳмет ҳамда Селим Байрактарни кўриши мумкин бўлади.
«Алп Арслон»
Бариш Ардуч ва Фаҳрие Эвжен бош қаҳрамонни гавдалантирадиган мазкур сериал «Уйғониш: Буюк Салжуқий»га приквел (воқеалари аввалроқ суратга олинган кино ёки сериалдаги воқеалардан олдин содир бўлган) бўлади. Унда Салжуқийлар давридан аввалроқ юз берган воқеа ва ҳодисалар кўрсатилади. Лойиҳа премьераси 2021 йилнинг сентябрига мўлжалланган.
Изоҳ (0)