O‘zbekiston Respublikasi Prezidenti tomonidan 2018-yil 23-fevralda qabul qilingan “Paxtasanoat ilmiy markazi” aksiyadorlik jamiyatining faoliyatini tubdan takomillashtirish chora-tadbirlari to‘g‘risida”gi PQ 3559-sonli qarori respublika paxta sanoatida ilmiy tadqiqotlarni yanada rivojlantirish uchun huquqiy zamin yaratdi.
Mazkur qarorga asosan, ilmiy markaz qoshidagi “Rim ustaxonasi” MChJning faoliyati tubdan takomillashtirildi. Ushbu korxona Paxtasanoat respublika ilmiy markazining eksperimental-mexanika sexi va “Bektemir paxta tozalash zavodi” OAJning mexanika sexi negizida 1998-yilda tashkil topgan bo‘lib, asosiy faoliyat yo‘nalishi ilmiy markaz laboratoriyalarining talabiga binoan stend qurilmalari, asbob-uskunalar, yangi turdagi mashinalarning namunalarini tayyorlab berish etib belgilangan. Korxona, shuningdek, paxta tozalash zavodlari uchun nostandart bo‘lgan uskunalar, alohida qismlar va uzellar ishlab chiqarish bilan shug‘ullanadi.
O‘tgan davr mobaynida ilmiy markazga biriktirilgan tajriba-eksperimental korxonalarida “Rim ustaxonasi” MChJ tomonidan ishlab chiqarilgan yangi turdagi mashina va mexanizmlarning sinovlari rayonlashtirilgan paxta xomashyosining texnik xususiyatlaridan kelib chiqqan holda olib borildi.
Hozirgi kunda “Rim ustaxonasi” MChJ tomonidan paxta tozalash korxonalari uchun 72 turdagi mashina-mexanizmlar va ehtiyot qismlar yetkazib berilmoqda. Shu bilan birga bu yerda arrali jinlar uchun samaradorligi yuqori bo‘lgan, arrali disklar ishlab chiqarishi yo‘lga qo‘yilgan. Joriy yil yakuniga qadar korxonada paxta tozalash zavodlarining asosiy ishlab chiqarish uskunalari hisoblangan jin, linter va UXK paxta tozalash uskunalarining takomilllashtirilgan nusxalari tayyorlandi.
Ilmiy markaz tasarrufidagi “Rim ustaxonasi” MChJ tomonidan ham 2020-yilda bir qator ijobiy ishlar amalga oshirildi. Xususan, ishlab chiqarish sexidagi dastgohlar to‘liq ishchi holatga keltirildi. Bundan tashqari, ishlab chiqariladigan mahsulotlarning sifatini oshirish maqsadida, texnopark uchun zamonaviy SDB (sonli dasturli boshqariluvchi) dastgohlar, jumladan, Uzstanex (Rossiya) firmasidan plazmali metall qirqish dastgohi, Perytone Engineering (Rossiya) firmasidan frezerlash va tokarlik dastgohlari hamda Ermak (Xitoy Xalq Respublikasi) firmasidan keltirilgan metall listlarni bukish dastgohi xarid qilinib, ishlab chiqarish sexiga o‘rnatish orqali ishga tushirildi.
Xitoy Xalq Respublikasining Hebei Hanwu Group firmasi hamkorlikda korxonamiz tomonidan djin-linter uskunalari uchun disk, kolosniklar va prokladkalar hamda remenlar ishlab chiqarilmoqda.
Shu bilan birga, O‘zbekiston Respublikasi Prezidentining 2018-yil 23-fevraldagi PQ 3559-sonli qarori ilovasida keltirilgan topshiriqlarni ijrosini ta’minlash maqsadida “Rim ustaxonasi” MChJ tomonidan quyidagi ishlar amalga oshirildi:
- urug‘lik chigitni takomillashtirilgan tuksizlantirish uskunasi tayyorlandi;
- separator-tozalagich uskunasi ishlab chiqarildi;
- ikki xil konstruksiyadagi 4.5 metr kub hajmli siklon ishlab chiqildi va “Bog‘dod paxta tozalash” korxonasida tajriba-sinov ishlari olib borildi;
- paxta terish mashinasida terilgan paxtaning iflosligi va namligi yuqori bo‘lgan xomashyosini birlamchi tozalash PT-10 rusumli uskunasi “Bog‘dod paxta tozalash” korxonasida o‘rnatilib, tajriba-sinov ishlari olib borildi;
- avtomat gorelkali issiqlik agenti TGU qurilmasi bo‘yicha “Bog‘dod paxta tozalash” korxonasida tajriba-sinov ishlari muvaffaqiyatli amalga oshirildi;
- UXK tozalash tizimidan ajratilgan chiqindi tarkibidagi paxtani regeneratsiyalash 2-RX uskunasi “Bog‘dod” va “Qiziriq paxta tozalash” korxonalarida o‘rnatilib, tajriba-sinov ishlari o‘tkazildi.
Bugungi kunda “Rim ustaxonasi” MChJ respublikadagi mavjud bo‘lgan barcha paxta-to‘qimachilik klasterlari tizimidagi paxta tozalash korxonalari bilan hamkorlikni yo‘lga qo‘ygan bo‘lib, ularning talabidan kelib chiqib, zarur bo‘lgan butlovchi ehtiyot qismlar va mashinalar shartnoma asosida tayyorlab beriladi.
“Paxtasanoat ilmiy markazi” AJ matbuot xizmati
Izoh (0)