“Hamkorbank” aksiyadorlik tijorat banki bugungi kunda 1 million 600 mingdan ortiq jismoniy shaxslarga hamda 40 mingga yaqin yuridik mijozlarga sifatli xizmat ko‘rsatib kelmoqda. Bu haqda 27-avgust kuni, chet el kapitali ishtirokidagi “Hamkorbank” aksiyadorlik tijorat banki tashkil etilganligining 30 yilligi munosabati bilan bo‘lib o‘tgan matbuot anjumanida ma’lum qilindi.
Ma’lumot uchun
“Hamkorbank” aksiyadorlik tijorat banki 30 yil avval, ayni O‘zbekiston Respublikasi mustaqilligi e’lon qilingan sanada — 1991-yilning 31-avgust kuni Andijon shahrida tashkil topgan. Dastlab bank “Andijonbank” deb nomlangan va ba’zi sabablarga ko‘ra, 2000-yilga kelib rebrending qilingan. Aynan shu yili respublikada birinchilardan bo‘lib, xalqaro standartlar asosida bank tizimida audit o‘tkazgan.
Anjumanda ta’kidlanishicha, “Hamkorbank” 30 yil davomida tezkor sur’atlar bilan o‘sish hisobiga bank tizimidagi o‘z o‘rnini doimiy mustahkamlashga erishgan. Barcha ko‘rsatkichlar bo‘yicha “Hamkorbank” mamlakatimizning Top-10 banklar qatoriga kiruvchi, davlat ulushi bo‘lmagan bankdir. Bank aktivlari oxirgi 5 yilda 2,8 barobarga, kredit portfelining salmog‘i 3,4 barobarga, depozit portfelining salmog‘i 1,4 barobarga, bank kapitalining salmog‘i esa 3,8 barobarga o‘sgan.
“Hamkorbank” ATB boshqaruv raisi o‘rinbosari Jasurbek Hasanovning ma’lum qilishicha, bankning xalqaro moliya bozorida tan olinishi juda muhim ahamiyatga ega.
“Asosiy maqsad — xalqaro miqyosda faoliyat olib boruvchi nufuzli moliya institutlariga bank ochiqligini namoyon etish va shu orqali ularni jalb qilish. Jumladan, 2001-yili Xalqaro moliya korporatsiyasi (IFC) ‘Hamkorbank’ga davlat kafolatisiz kredit liniyasini taqdim etdi. Ushbu kredit liniya mablag‘lari xususiy sektorni rivojlantirish va kichik biznesni qo‘llab-quvvatlashga yo‘naltirildi. IFC bilan namunali hamkorlik ko‘plab boshqa nufuzli xalqaro moliya institutlarining bankka bo‘lgan ishonchini mustahkamladi. Natijada o‘sha yilning o‘zida Jahon banki hamda Yevropa tiklanish va taraqqiyot banki bilan hamkorlik yo‘lga qo‘yildi. Bugungi kunga kelib, bank yigirmaga yaqin xalqaro moliya institutlari va to‘lov tizimlari bilan o‘zaro manfaatli hamkorlikni amalga oshirib kelmoqda”, — deydi Jasurbek Hasanov.
Uning qo‘shimcha qilishicha, “Hamkorbank” kelgusi 5 yillikda raqamli bank xizmatlarini joriy qilish bo‘yicha muhim qadamlarni tashlaydi.
“Bu orqali respublika chakana bank xizmatlari bozorini rivojlantirish, bank ofislari tarmoqlari va biznes jarayonlari optimallashtiriladi. Natijada bank faoliyatining samaradorligi yanada oshadi hamda mijozlarga xizmat ko‘rsatish sifati yangi bosqichga olib chiqiladi”, — dedi “Hamkorbank” ATB boshqaruv raisi o‘rinbosari.
“Hamkorbank” 30 yil davomida o‘z tarmoqlarini respublika hududlari bo‘yicha kengaytirish bilan birga o‘z jamoasini ham kengaytirdi. Faoliyatini 15 kishi bilan boshlagan bankda bugunga kelib, respublika bo‘ylab bank ofislarida 3 ming 350 nafar xodim samarali mehnat qilmoqda.
Bank respublikaning barcha xududlarida faoliyat yuritayotgan 46 ta filialiga, shuningdek, mijozlarga yanada yaqinroq bo‘lish maqsadida respublikaning chekka shahar va tumanlarida ham 100 dan ortiq bank xizmatlari ofislariga ega. Shu bilan birga, bank bo‘linmalarida hamda respublika shahar markazlarining aholi gavjum joylarida 130 dan ortiq, 24/7 rejimida o‘z-o‘ziga xizmat ko‘rsatish shoxobchalari faoliyat yuritmoqda. Aynan bankning 30 yilligi arafasida, sentabr oyida 47-filial — Mirobod filiali o‘z faoliyatini boshlaydi.
Reklama huquqi asosida.
Izoh (0)