Toshkent shahridagi qator tumanlarda joylashgan ko‘p qavatli turar joy binolari devoriga giyohvandlik vositalari reklamasini chizgan shaxslar qo‘lga olindi, deb xabar beradi poytaxt IIBB axborot xizmati.
Ma’lum qilinishicha, 24-avgust kuni IIVning Telegram’dagi @stopnarko_bot botiga anonim foydalanuvchidan ikki nafar noma’lum shaxs poytaxtda giyohvandlik vositalarining reklama ko‘rinishidagi graffitlarni ko‘p qavatli uylarning devorlariga yozish bilan shug‘ullanayotgani to‘g‘risida foto va videotasvirlar kelib tushgan.
Toshkent shahrida olib borilgan tezkor tadbirlar davomida:
- Mirzo Ulug‘bek tumani TTZ-4 mavzesidagi 6, 7, 8, 9, 10-ko‘p qavatli uylarning devorlarida — 25 ta;
- Yashnobod tumani “Aviasozlar” (sobiq “Kadisheva”) dehqon bozoriga kirish joyi yonidagi ko‘p qavatli uylarning devorlarida — 15 ta;
- Yashnobod tumani Farg‘ona yo‘li ko‘chasidagi “Qo‘yliq” qurilish mollari bozori ro‘parasidagi 9 qavatli uylarning devorlarida — 22 ta, jami 62 ta bir xil turdagi giyohvandlik moddalarini sotuvchi internet do‘konlarini targ‘ib qiluvchi graffitilar yozib ketilganligi aniqlangan.
Hozirda mazkur jinoiy guruhning qolgan a’zolarini hamda ularni moliyalashtirganlarni aniqlash ishlari olib borilmoqda.
“Agar siz yoki yaqinlaringiz mazkur shaxslarning harakatlaridan jabrlangan yoki ularning jinoiy faoliyati haqida biror ma’lumotga ega bo‘lsangiz darhol ichki ishlar organlariga xabar berishingizni yoki 102 raqamiga qo‘ng‘iroq qilishingizni so‘raymiz. Shaxsingiz sir saqlanishi kafolatlanadi”, — deyiladi vazirlik xabarida.
Eslatib o‘tamiz, so‘nggi yillarda giyohvand moddalar to‘g‘risida reklama vaqti-vaqti bilan Toshkentning turli tumanlarida paydo bo‘layotgani haqida xabar berilgan edi. Shu sababli AOKA IIV bilan birgalikda @stopnarko_bot Telegram-botini ishga tushirdi. Giyohvand moddalar reklamasi haqida ushbu Telegram-bot orqali xabar berish mumkin.
Izoh (0)