Тошкент шаҳридаги қатор туманларда жойлашган кўп қаватли турар жой бинолари деворига гиёҳвандлик воситалари рекламасини чизган шахслар қўлга олинди, деб хабар беради пойтахт ИИББ ахборот хизмати.
Маълум қилинишича, 24 август куни ИИВнинг Telegram’даги @stopnarko_bot ботига аноним фойдаланувчидан икки нафар номаълум шахс пойтахтда гиёҳвандлик воситаларининг реклама кўринишидаги граффитларни кўп қаватли уйларнинг деворларига ёзиш билан шуғулланаётгани тўғрисида фото ва видеотасвирлар келиб тушган.
Тошкент шаҳрида олиб борилган тезкор тадбирлар давомида:
- Мирзо Улуғбек тумани ТТЗ-4 мавзесидаги 6, 7, 8, 9, 10-кўп қаватли уйларнинг деворларида — 25 та;
- Яшнобод тумани «Авиасозлар» (собиқ «Кадишева») деҳқон бозорига кириш жойи ёнидаги кўп қаватли уйларнинг деворларида — 15 та;
- Яшнобод тумани Фарғона йўли кўчасидаги «Қўйлиқ» қурилиш моллари бозори рўпарасидаги 9 қаватли уйларнинг деворларида — 22 та, жами 62 та бир хил турдаги гиёҳвандлик моддаларини сотувчи интернет дўконларини тарғиб қилувчи граффитилар ёзиб кетилганлиги аниқланган.
Ҳозирда мазкур жиноий гуруҳнинг қолган аъзоларини ҳамда уларни молиялаштирганларни аниқлаш ишлари олиб борилмоқда.
«Агар сиз ёки яқинларингиз мазкур шахсларнинг ҳаракатларидан жабрланган ёки уларнинг жиноий фаолияти ҳақида бирор маълумотга эга бўлсангиз дарҳол ички ишлар органларига хабар беришингизни ёки 102 рақамига қўнғироқ қилишингизни сўраймиз. Шахсингиз сир сақланиши кафолатланади», — дейилади вазирлик хабарида.
Эслатиб ўтамиз, сўнгги йилларда гиёҳванд моддалар тўғрисида реклама вақти-вақти билан Тошкентнинг турли туманларида пайдо бўлаётгани ҳақида хабар берилган эди. Шу сабабли АОКА ИИВ билан биргаликда @stopnarko_bot Telegram-ботини ишга туширди. Гиёҳванд моддалар рекламаси ҳақида ушбу Telegram-бот орқали хабар бериш мумкин.
Изоҳ (0)