Hozirda O‘zbekistonda “Sputnik V”ning birinchi dozasi bilan emlangan fuqarolar vaksinaning ikkinchi dozasini o‘z vaqtida ololmayotgani kuzatilmoqda. O‘zbekiston sanitariya-epidemiologik osoyishtalik va jamoat salomatligi xizmati, vaksinalar va immunoprofilaktika bo‘limi boshlig‘i Dilorom Tursunovaning ma’lum qilishicha, 30-avgust kuni mamlakatga Rossiya vaksinasining navbatdagi partiyasi olib kelinadi. Bu haqda Innovatsion rivojlanish vazirligi axborot xizmati xabar berdi.
“To‘g‘ri, ‘Sputnik V’ vaksinasining navbatdagi partiyasini keltirish bo‘yicha biroz ushlanishlar kuzatilmoqda. Aytishim mumkinki, 30-avgust kuni mamlakatimizga ‘Sputnik V’ vaksinasi keltiriladi. Bunday savol bilan ko‘plab fuqarolar murojaat qilmoqda. Ushbu vaksinaning 1- va 2-dozalari o‘rtasida 21 kun oraliq belgilangan. Endilikda 1- va 2-chi dozalarining o‘rtasidagi oraliq uzoq muddatga cho‘zilgani sababli vaksinaning amal qilish muddati tugadi yoki boshqatdan olish kerak, degan gaplar aholi orasida ko‘paydi.
Vaksina bilan emlanish oralig‘i kamida 21 kun deb belgilangan bo‘lsa, 12 haftagacha uzaytirilishi ham ziyon keltirmaydi. Vaksina olib kelinishi bilan 1-komponent bilan emlangan barcha fuqarolarga 2-komponenti ham qilinadi”, — deydi Tursunova.
Eslatib o‘tamiz, shu kunga qadar 13,751 million dozadan ortiq vaksinadan emlash jarayonlarida foydalanildi. Shuningdek, shu kungacha koronavirusga qarshi to‘liq emlangan fuqarolar 1 679 949 nafarni tashkil qilmoqda.
Mavzuga doir:
Izoh (0)