Toshkent shahrida Paynet shoxobchasida ishlovchi yigit rahbariga tegishli pulni totalizatorda yutqazib qo‘yib, o‘zini pichoqladi, deya xabar bermoqda Oliy sud axborot xizmati.
Ma’lum qilinishicha, Toshkentda N.R. Paynet shoxobchasida ishlab turib, kassadagi, do‘kon egasi N.T.ga tegishli bo‘lgan, 6 million so‘m miqdoridagi pulni ijtimoiy tarmoqdagi virtual o‘yinga tikib, yutqazib qo‘yadi.
Shundan so‘ng u pullarni qaytara olmasligini bilib, do‘kondagi shkaf tortmasida turgan pichoq bilan o‘zining qorin sohasiga tan jarohati yetkazib, IIBBga telefon qilgan hamda go‘yoki noma’lum shaxs unga pichoq bilan tan jarohati yetkazib, do‘kon kassasidagi 6 million so‘mni bosqinchilik yo‘li bilan tortib olganini aytgan.
Sud tomonidan N.R. Jinoyat kodeksining 237-moddasi 2-qismining “a” va “g” bandlarida (ayblovning sun’iy dalillarini vujudga keltirgan holda og‘ir yoki o‘ta og‘ir jinoyat sodir etishda ayblab sodir etilgan yolg‘on xabar berish) ko‘rsatilgan jinoyatni sodir etganlikda aybli deb topildi va shu moddaga 57-moddasini (yengilroq jazo tayinlash) qo‘llab, unga 2 yil ozodlikni cheklash jazosi tayinlandi.
Bundan avval Samarqandda o‘g‘irlagan qariyb 20 million so‘mni totalizatorga tikib yuborgan yigitga jinoyat ishi qo‘zg‘atilgani, o‘zbekistonlik ayol erining 400 million so‘mini totalizatorda yutqazib qo‘ygani hamda Farg‘onada o‘zganing plastik kartasidan pul o‘g‘irlab, ularni totalizatorga tikib yuborgan maktab o‘quvchisi sudlangani haqida xabar berilgandi.
Izoh (0)