O‘zbekiston yetti oy ichida xorijdan 1,4 mln dona mobil telefon import qilgan
2021-yilning yanvar—iyul oylarida O‘zbekiston xorijdan qiymati 94,3 million AQSh dollariga teng bo‘lgan 1,4 million dona mobil telefonlar import qilgan. Bu haqda Davlat statistika qo‘mitasi xabar berdi.
Foto: “Daryo”
Ta’kidlanishicha, telefon importi o‘tgan yilning mos davri bilan solishtirilganda 1 million donaga oshgan.
O‘zbekiston 11 ta davlatdan mobil telefonlar import qilgan bo‘lib, ularning eng ko‘pi quyidagi mamlakatlardan amalga oshirilgan:
Xitoy – 896,4 ming dona
Vyetnam – 257,5 ming dona
BAA – 148,8 ming dona
Hindiston – 48,6 ming dona
Qozog‘iston – 45,0 ming dona
Rossiya – 967 dona
Janubiy Koreya – 700 dona
Avvalroq O‘zbekistonda mobil aloqa abonentlari soni 27 million nafarga yaqinlashgani, O‘zbekiston mobil internet arzonligi bo‘yicha dunyo reytingida 21-o‘rinni egallagani to‘g‘risida xabar berilgandi.
Eslatib o‘tamiz, O‘zbekistondagi mobil telefonlar maxsus IMEI kodi bo‘yicha ro‘yxatga olinishi tartibi 2019-yil 1-apreldan joriy etilgan. 2020-yil 22-sentabr kuni mobil qurilmalarning IMEI kodlarini ro‘yxatdan o‘tkazish tizimi ma’muriyati tomonidan mobil qurilmalarni UzIMEI tizimida ro‘yxatdan o‘tkazish jarayoniga o‘zgartirish kiritilgan, unga ko‘ra, qurilmaning IMEI kodini/kodlarini ro‘yxatdan o‘tkazishda jismoniy shaxslar tomonidan foydalaniladigan abonent raqami mahalliy mobil operatorlaridan ariza beruvchi nomiga rasmiylashtirilgan bo‘lishi kerakligi belgilangandi. Qator OAV va blogerlar mazkur o‘zgarish qonunga zid ravishda amalga oshirilgan bo‘lishi mumkinligini bildirgan.
Izoh (0)