Qashqadaryoda firibgarlik jinoyatini sodir etib, javobgarlikdan qochib yurgan kosonlik fuqaro Dehqonobod tumanida qo‘lga olindi. Bu haqda “Daryo”ga viloyat IIB axborot xizmati rahbari Iroda Rasulova xabar berdi.
Qayd etilishicha, fuqaro viloyat miqyosida o‘tkazilayotgan “Tong” tadbirida tuman IIB xodimlari tomonidan ushlangan.
“Mamlakatimizda huquqbuzarliklar va jinoyatlarni erta aniqlab, ularning oldini olish, ro‘y berganlarini fosh etish borasida ichki ishlar organlari xodimlari tomonidan bir qator profilaktik tadbirlar uyushtirilmoqda. Bunda fuqarolarning osuda turmush tarziga zamin hozirlash, ko‘cha va fuqarolar gavjum to‘planadigan joylar, choyxona va kafe-barlarda jamoat tartibini saqlashga, jinoyat sodir etib, tergov idoralaridan qochib yurgan shaxslarni ushlab qonun izmiga topshirishga e’tibor qaratilmoqda”, — deydi Dehqonobod tuman IIB boshlig‘i o‘rinbosari Dilshod Mirzayev.
Ta’kidlanishicha, viloyat miqyosida o‘tkazilayotgan “Tong” tadbirida viloyat ichki ishlar boshqarmasi sohaviy xizmatlari va Milliy gvardiya xodimlaridan tuzilgan sakkizta guruhga 200 nafarga yaqin xodim jalb etilgan. Tadbir davomida huquqbuzarlik va jinoyat sodir etishga moyil 77 nafar fuqaro ichki ishlar organlariga olib kelinib, ularning suratlari va barmoq izlari olingan. Hamda har biriga kelgusida jinoyat sodir etmasligi haqida tushuntirish ishlari olib borilib, jinoyatga jazo muqarrarligi tushuntirilgan.
“O‘zgalarni aldash va chuv tushirish jinoyatini sodir etgani uchun Qarshi shahar IIO FMB huzuridagi Tergov bo‘limi tomonidan Jinoyat kodeksining 168-moddasi 2-qismi (firibgarlik) 227-moddasi (hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast yetkazish yoki ularni yashirish) bilan jinoyat ishi qo‘zg‘atilgan Koson tumani Boyterak qishlog‘ida yashovchi N.F. jazodan qochib qutulmoqchi bo‘ldi, shekilli, tutqich bermay yurdi. Ammo uning qochishi uzoqqa bormadi. Gumondor viloyat IIB JQB, Qarshi shahar IIO FMB 2-sonli IIB, boshqarma PPX va JTSB va Dehqonobod tumani IIB xodimlari tomonidan Dehqonobod tumani hududidan ushlandi”, — deydi Iroda Rasulova.
Qo‘shimcha qilinishicha, viloyatda “Xavfsiz hudud” tadbiri ham tashkil etilgan bo‘lib, tadbir davomida 76 nafar fuqaro ichki ishlar bo‘limiga olib kelingan.
“Shundan 8 nafari spirtli ichimlik iste’mol qilib, jinoyat sodir etish ehtimoli yuqori bo‘lgani uchun viloyat narkologiya dispanseriga yotqizildi. Yana 9 nafar yengil tabiatli xotin-qiz viloyat teri-tanosil kasalliklari dispanseriga joylashtirilgan. Bundan tashqari uch nafar shaxsdan sovuq qurol — pichoq va tir miltig‘i hujjatlashtirib olindi”, — deydi viloyat IIB axborot xizmati rahbari.
Izoh (0)