Ayni vaqtda bo‘lib o‘tayotgan Oliy Majlis Senatining 18-yalpi majlisida Tashqi ishlar vazirligining 2021-yil birinchi yarim yillik faoliyati to‘g‘risidagi axboroti eshitildi, deb xabar beradi “Gazeta.uz”.
Hisobotdan so‘ng Senatning Mudofaa va xavfsizlik masalalari qo‘mitasi raisi Qutbiddin Burhonov tashqi ishlar vazirining birinchi o‘rinbosari Farhod Arziyevga Afg‘oniston masalasidagi savol bilan yuzlangan.
“Bugungi kunda juda ko‘p davlatlar tomonidan ekstremistik-terroristik harakat deb tan olingan ‘Tolibon’ning bizga qo‘shni bo‘lgan Afg‘onistonda rahbarlikka kelgani munosabati bilan siz O‘zbekiston tashqi siyosatini qanday ko‘rasiz?”, — deya so‘ragan senator.
“Siz ko‘targan masalangiz nafaqat mintaqamiz, balki xalqaro xavfsizlik tartibidagi dolzarb mavzu. Hammamiz yaxshi bilamiz, Afg‘onistonda hozir yangi voqelik, yangi vaziyat yuzaga kelgan. Hozir Afg‘onistonda oldindan prognoz qilib bo‘lmaydigan jarayonni kuzatyapmiz. Lekin bitta narsani bilishimiz kerak, hurmatli Prezidentimiz belgilab bergan tashqi siyosat tamoyillari asosida, bevosita Afg‘oniston bilan munosabatlarimiz yo‘nalishlarida belgilab bergan fundamental yondashuvlar, asosiy vazifalar doirasida bugun emas, anchadan beri O‘zbekiston Afg‘onistondagi tinchlik jarayonlariga bevosita hissa qo‘shib kelyapti”, — deydi Farhod Arziyev.
U Prezident tashabbusi bilan 2018-yilda Toshkentda Afg‘oniston bo‘yicha maxsus xalqaro konferensiya o‘tkazilgani, 2021-yilda Markaziy Osiyo va Janubiy Osiyo xalqaro konferensiyasida ham Afg‘oniston mojarosi muhim mavzulardan biri bo‘lganini tilga olgan.
“Eng avvalo, biz Afg‘onistonda barcha siyosiy kuchlarning manfaatini e’tiborga oladigan, ularning o‘zaro tinchlik muzokaralari natijasida erishiladigan hukumat shakllanishi tarafdorimiz. Biz Afg‘onistonda qurolli kuch ishlatish yo‘li bilan afg‘on muammosi hal bo‘ladi degan yondashuvdan doim yiroq bo‘lganmiz”, — deydi tashqi ishlar vaziri o‘rinbosari.
“‘Tolibon’ harakati bilan bir necha yillardan beri muloqot qilib kelyapmiz. Va, albatta, ‘Tolibon’ga ham Afg‘oniston jamiyatining inkor etib bo‘lmaydigan faktori sifatida yondashamiz. Keyingi yondashuvlarimizda ham aynan mana shu prinsiplar biz uchun asosiy yo‘nalish bo‘lib qoladi. Afg‘oniston yon qo‘shnimiz, jon qo‘shnimiz, qolaversa, bu davlatga Markaziy Osiyoning ham ajralmas qismi sifatida qaraymiz”, — deydi TIV vakili.
Arziyev so‘zi yakunida Afg‘onistonda barqaror tinchlik o‘rnatish, uni xalqaro rivojlanishi uchun zarur omillarni yaratishga qaratilgan hamma sa’y-harakatlarda O‘zbekiston faol ishtirok etishini qo‘shimcha qilgan.
Mavzuga doir:
- Abdulaziz Komilov Saudiya Arabistoni tashqi ishlar davlat vaziri bilan Afg‘onistondagi voqealarni muhokama qildi
- Afg‘onistonda etnik o‘zbeklar va tojiklar “Tolibon”ga qarshi koalitsiya tuzmoqda (video)
- Afg‘onistonning 150 nafar fuqarosi orqaga qaytarilgan, “Tolibon” ularning xavfsizligini kafolatlagan — O‘zbekiston TIV
Izoh (0)