O‘zbekiston Oliy sudida 2021-yil 25-avgust kuni o‘tkazilgan ochiq sud majlislarida mustabid Sovet tuzumi davrida qatag‘on qurboni bo‘lgan va hozirgi kunga qadar oqlanmagan 115 nafar shaxs jami 6 ta jinoyat ishi bo‘yicha oqlandi. Sud jarayonlaridan keyin Oliy sud raisi o‘rinbosari Ikrom Muslimov jurnalistlarni qiziqtirgan savollarga javob qaytardi. Bu haqda “Daryo” muxbiri Mirolim Isajonov xabar bermoqda.
— Bugungi sud majlisida qatag‘on qurbonlarining faqat 115 nafarining nomi oqlandi. Qolganlari-chi?
— Prezident farmoyishi e’lon qilinganidan keyin biz igna bilan quduq qazigandek qurbonlarning 28 nafarini topdik. Shundan so‘ng hujjatlarni ko‘tarsak, bu ish doirasida 115 nafar shaxs bor ekan. Ular nomining oqlangani farmoyish asosida qilingan ishning birinchi mevasi, deyish mumkin.
Agar haqiqatan fuqarolarimiz orasida bir paytlari ajdodlarim qatag‘on qurboni bo‘lgan, degan fikrda yuruvchilar bo‘lsa, ishchi guruhga murojaat qilishsin va biz albatta, uni o‘rganib, ko‘rib chiqamiz.
— Qurbonlarning avlodlarini topish katta vaqt talab qiladi yoki hammasining ham qarindoshlarini topib bo‘lmasligi mumkin. Shuning uchun “bosmachi” tamg‘asi qo‘yilgan barcha vatanparvar shaxslar nomi bitta maxsus huquqiy hujjat bilan oqlanishi kerakdir, balki?
— Har bir tashkilotning, har bir rahbarning o‘z vakolati bor. Biz vakolat doirasida ish qilishimiz kerak. Mana, hozir qurbonlarning har birining ism-familiyasini erinmasdan uch martadan o‘qib chiqdim. Bu mening vazifam.
O‘sha davrda favqulodda sudlar tashkil qilingan. Bugungi kunda O‘zbekistonda favqulodda sud tashkil etilishiga yo‘l qo‘yilmaydi. Bu Konstitutsiya bilan belgilangan. Agar shunaqa holatlar bo‘ladigan bo‘lsa, biz bu bo‘yicha ishlashga tayyormiz. Bitta farmon bilan kimni oqlab bo‘ladi?
Shu o‘rinda bir misol keltiraman, qurbonlar ro‘yxatida Qosimov Sa’dulla degan inson bor. U Oliy sudning birinchi raisi bo‘lgan, lekin qatag‘on qurboni bo‘lib ketgan. Unga oid jinoyat ishini Rossiyada ko‘rishgan va jinoyat ishi hujjatlari bugungi kunda Rossiya Oliy sudida saqlanyapti. O‘sha insonning jinoyat ishi bizning qo‘limizda bo‘lmaganligi uchun jarayonga o‘tolmadik. O‘ylaymanki, respublika ishchi guruhi diplomatik yo‘llar bilan u ishga oid hujjatlarni ham chaqirib, ko‘rib chiqadi.
— “Bosmachi”larni sotganlar yoki ularga guvohlik berganlarning ism-familiyasi nega oshkor qilinmayapti?
— Jinoyat ishi doirasida hammasi mavjud. Biz hozir birinchi bosqichdamiz.
— Nomi oqlangan 115 nafar qatag‘on qurbonlarining avlodlari moddiy yoki ma’naviy zarar undirish bo‘yicha keyingi bosqichga chiqishi mumkinmi?
— Jinoyat-protsessual kodeksida reabilitatsiya asoslari bor. Agar shu asoslar bo‘yicha tegishli sudlarga murojaat qilinsa, ko‘rib chiqiladi.
Izoh (0)