Наманган вилояти Норин туманида бир гуруҳ шахслар пичоқбозлик уюштиргани акс этган видео тарқалди. Ҳолат юзасидан Наманган ИИБ ахборот хизмати маълумот берди.
Қайд этилишича, 2021 йил 30 июль куни соат 12:40 ларда Норин туманида яшовчи, 1992 йилда туғилган фуқаро Б.Н. Норин туманида жойлашган тирик балиқлар сотиш дўкони олдида шу туманда яшовчи таниши, 1992 йилда туғилган фуқаро О.В. билан ўрталаридаги келишмовчилик сабабли автомашина ичида ўзаро жанжаллашиб, ёнида бўлган ошпичоқ билан чап оёқ болдир соҳасига бир маротаба уриб, ўртача оғир тан жароҳати етказган.
Ушбу ҳолат бўйича Норин туман ИИБ ҳузуридаги ТБ томонидан 2021 йил 30 июль куни Жиноят кодексининг 105-моддаси 2-қисми «м» банди (совуқ қурол сифатида фойдаланилиши мумкин бўлган ашёларни ишлатиб, қасддан баданга ўртача оғир шикаст етказиш) билан жиноят иши қўзғатилиб, Б.Н.га нисбатан қамоққа олиш тарзидаги эҳтиёт чораси қўлланилган.
Жиноят иши доирасида мазкур ҳолат иштирокчиларининг қиморга хўроз уриштириш билан шуғулланишлари ҳақидаги маълумот мавжуд эмаслиги сабабли тергов жараёнида ушбу ҳолат тергов йўли билан текширилиб, ҳуқуқий баҳо берилади.
«Айрим ижтимоий тармоқ фойдаланувчилари томонидан ушбу фуқароларни қиморбозлар дея таърифлаш учун, аввало, исбот ва далил бўлмоғи лозим. Шу ўринда хабар тарқатаётганда хабарда берилган изоҳлар аниқ фактларга асосланган эканлигига ишонч ҳосил қилгач, оммага эълон қилишларини сўраб қоламиз», — дейилади ИИБ хабарида.
Бундан аввал Қашқадарёда икки шахс ички ишлар ходимларига пичоқ билан ҳужум қилгани, Андижондаги бозорда тенгдошини пичоқлаб, унинг ўлимига сабабчи бўлган фуқаро 8 йилга қамалгани ҳамда Жиззахда икки киши пичоқланиши оқибатида вафот этгани ҳақида хабар берилганди.
Изоҳ (0)