Бухоро амирларидан бири Сайид Абдулаҳадхоннинг Навоий вилояти Кармана туманида жойлашган ёзги қароргоҳи хароба ҳолга келиб қолгани ҳақида хабар тарқалди. Навоий вилояти Туризм ва спорт бош бошқармаси реставрация учун бюджетдан 3,1 миллиард сўм ажратилганини маълум қилди.
Карманадаги «Мирзачорбоғ» қароргоҳи хароб ҳолдалиги акс этган суратлар ижтимоий тармоқларда эълон қилинди ва тармоқ фойдаланувчилари кескин танқидларига сабаб бўлди. Унда Бухоро амири Абдулаҳадхон томонидан 1900—1905 йилларда барпо этилган ушбу маданий мерос объекти таъмирталаб аҳволга келиб қолгани акс этган суратлар келтирилган.
Навоий вилояти Туризм ва спорт бош бошқармаси хабарида айтилишича, Кармана тумани «Кўҳна Қўрғон» МФЙ ҳудудида жойлашган, XIX асрда бунёд этилган «Мирзачорбоғ» хонқароргоҳи Ўзбекистон маданий мерос объектларини таъмирлаш ишлари 2021 йил дастурига киритилган бўлиб, лойиҳа-смета ҳужжатлари тайёрланган ва ушбу дастур бўйича тайёрланган лойиҳа-смета ҳужжатлари Илмий эксперт кенгашидан ўтказилиб, давлат бюджетидан 3,1 миллиард сўм маблағ ажратилган ҳамда яқин кунларда тендер савдолари амалга оширилади.
Шу ўринда давлат мулки ҳисобланадиган маданий мерос объектларини таъмирлаш, реставрация қилиш ишлари Вазирлар Маҳкамасининг 2019 йил 20 декабрдаги «Моддий маданий мероснинг кўчмас мулк объектларини асрашга доир фаолиятни лицензиялаш тўғрисидаги низомни тасдиқлаш ҳақидаъги 1021-сонли қарор асосида маданий мерос объектларини таъмирлаш ишларига рухсат берувчи лицензияга эга бўлган ташкилотлар томонидан амалга оширилиш мумкинлиги маълумот сифатида келтириб ўтилган.
Сайид Абдулаҳадхоннинг ёзги қароргоҳи хароба ҳолга келиб қолгани ҳақида 2020 йилда ҳам айтилганди. Ўшанда Маданият вазирлиги объектни 2021—2022 йилларда тўлиқ реставрация қилиш режалаштирилганини маълум қилганди.
Бундан аввал Бухорода XVI асрда қурилган «Абдуллахон» мадрасаси деворининг бир қисми 30 июль кечаси ўпирилиб тушгани тўғрисида хабар берилганди. Маданий мерос объекти ҳисобланган «Абдуллахон» мадрасаси деворининг бир қисми қулаб тушгани ҳолати вилоят прокуратураси томонидан ўрганилиб, ўрганиш натижасида Жиноят кодексининг 207-моддаси (мансабга совуққонлик билан қараш) билан жиноят иши қўзғатилганди. Дастлабки ҳисоб-китобларга кўра, обидани тўлиқ таъмирлаш ва тиклаш ишлари учун, тахминан, 6 миллиард сўм талаб этилади.
Изоҳ (0)