Jazoir Marokash bilan diplomatik aloqalarni uzmoqda. Bu haqda Jazoir tashqi ishlar vaziri Ramtan Lamamraga tayanib, Algeria Press Service xabar berdi.
“Jazoir bugundan boshlab Marokash bilan diplomatik aloqalarni uzishga qaror qildi”, — dedi Lamamra.
Vazir Marokashni “Isroil texnologiyasidan foydalangan holda Jazoir fuqarolari va amaldorlariga qarshi sodir etilgan ommaviy va tizimli josuslikda” aybladi. Gap Isroilning NSO Group firmasi tomonidan ishlab chiqilgan Pegasus dasturini qo‘llash haqida ketmoqda.
18-avgust kuni Jazoir prezidenti Abdulmajid Tebbun Milliy Xavfsizlik Kengashining yig‘ilishini chaqirgan va Marokash bilan munosabatlarni qayta ko‘rib chiqish zarurligini ma’lum qilgan. U Rabotni Jazoirga qarshi “dushmanlik harakatlarida” aybladi.
Uning fikricha, oldinroq butun mamlakat bo‘ylab tarqalgan o‘rmon yong‘inlarining tashabbuskorlari MAK — Jazoir shimolida yashovchi Kabil xalqining o‘z taqdirini o‘zi belgilash harakati a’zolari bo‘lgan. Rasmiylarning fikricha, harakat Marokashdan pul oladi.
Ayg‘oqchilik dasturi ikki mamlakat munosabatlaridagi yana bir muammoli tomonga aylandi. 2020-yilning aprel oyida Facebook NSO Group’ni turli mamlakatlardagi WhatsApp foydalanuvchilarini kuzatadigan texnologiyalar yaratish va sotishda ayblagandi. Da’vogarning ta’kidlashicha, texnologiyalardan turli mamlakatlarda, jumladan, muxolif fikrli fuqarolarni: jurnalistlar, huquq himoyachilari va boshqalarni aniqlashda foydalanilgan.
2021-yilning iyul oyida Jazoir hukumati ushbu dasturiy ta’minotni o‘z fuqarolariga nisbatan ishlatilishi bo‘yicha tergov boshladi. Hukumat fikricha, jazoirliklar Marokash hukumati tomonidan kuzatilgan.
Avvalroq jurnalistlar turli mamlakatlar hukumati Pegasus’dan siyosatchilar, huquq himoyachilari va jurnalistlarni ommaviy kuzatish uchun foydalanganini aniqladi.
The Washington Post xabariga ko‘ra, Pegasus orqali kuzatish nishonlari orasida 14 ta davlat rahbari bo‘lgan. Ular orasida Fransiya prezidenti Emmanuel Makron ham bor. Shuningdek, Telegram asoschisi Pavel Durov ham Pegasus orqali kuzatilgan bo‘lishi mumkin.
Pegasus — bu zararli dastur bo‘lib, u iOS yoki Android qurilmalariga kirib boradi va foydalanuvchiga bildirmasdan xabarlar, fotosuratlar, joylashuv ma’lumotlariga kirish, kamera va mikrofonni faollashtirishga imkon beradi.
Izoh (0)