Koronavirus pandemiyasi tufayli aksariyat klublar qimmat transferlarni amalga oshira olmadi. Biroq inqiroz davri bo‘lishiga qaramay baribir tarkibni kuchaytirish kerak, shu bois ushbu yozda futbolchilarni erkin agent sifatida o‘z safiga qo‘shib olish holatlari ko‘paydi. Erkin agent deganda sobiq klublari bilan shartnomasi tugagan va uni uzaytirmagan futbolchilar tushuniladi. Odatda o‘rtamiyona futbolchilar erkin agent sifatida jamoasini o‘zgartirardi. Ammo bu safar erkin agentlarning aksariyati yulduz darajasidagi futbolchilar bo‘ldi. “Chempionat” Transfermarkt portaliga tayanib, transfer narxi 10 million yevrodan yuqori bo‘lgan futbolchilarni (erkin agentlarni) bir sahifaga jamladi. Aytish mumkinki, ushbu transfer oynasida “Milan” shunchaki to‘nab ketildi.
Janluiji Donnarumma, “PSJ”
Transfer narxi: 60 million yevro
“Milan” o‘z tarbiyalanuvchisi uchun, taxminan, sakkiz million yevro maosh taklif qildi, ammo darvozabon 12 million so‘radi. Bu summa esa klub uchun ko‘plik qildi. Shu tariqa Yevro—2020 o‘rtasida Donnarumma erkin agentga aylandi. Vaziyatni kuzatayotgan “PSJ” darhol ishga kirishdi va italiyalik posbonga o‘zi xohlagan maoshni taklif qildi. Ushbu vaziyatda “PSJ”ning qarorini tushunish qiyin, chunki jamoada Keylor Navasdek yetuk darvozabon bor edi.
David Alaba, “Real”Transfer narxi: 55 million yevro
Markaziy va chap qanot himoyachisi “Bavariya” bilan yangi shartnoma borasida kelisha olmadi va “Real”ga yo‘l oldi. Myunxen klubi ochiqchasiga undan norozi ekanini bildirdi, Oliver Kan klub futbolchiga anchayin “yog‘li” shartnoma taklif qilganini aytdi. Alabaning o‘zi esa har doim “Real”ning afsonaviy oq libosida o‘ynashni xohlaganini ta’kidladi. Avstriyalik bu haqida gapirmasa ham, maoshi sezilarli darajada “jozibali”: yiliga 12 million yevro. Madridliklar uchun esa bu shunchaki ajoyib transfer.
Memfis Depay, “Barselona”
Transfer narxi: 45 million yevro
Kataloniyaliklarning katta moliyaviy muammolari bor, lekin ko‘plab futbolchilar hamon bu jamoada o‘ynashni xohlaydi. Depay Messi bilan o‘ynash uchun hatto “Lion”dagi maoshidan kamroqqa ham rozi bo‘lgandi, biroq unga daho bilan birga to‘p tepish nasib etmadi. Niderlandiyalik hujumchi so‘nggi mavsumlarda o‘zini ko‘rsatmoqda, hozir u 27 yoshda va aytish mumkinki, faoliyatining eng yuqori cho‘qqisida.
Xoqon Chalxono‘g‘lu, “Inter”
Transfer narxi: 35 million yevro
Ushbu yozda “Milan”ni tekinga tark etgan yana bir kuchli futbolchi Xoqon bo‘ldi. Uning jamoadan ketganidan muxlislarning xursand bo‘lishi dargumon, lekin klub Xoqonning maoshini oshirish haqidagi istagini rad etdi. Natijada turkiyalik hech ikkilanmasdan jamoasini o‘zgartirdi: yangi mavsumni u “Inter” safida boshladi. “Inter” esa zudlik bilan Yevro—2020 da hushidan ketgan Kristian Eriksenga o‘rinbosar topishi kerak edi. Klub bu ishni bir yevro ham sarflamagan holda bajardi.
Jorjino Veynaldum, “PSJ”
Transfer narxi: 30 million yevro
Parijliklar tekinga qo‘lga kiritgan yana bir yuqori darajali futbolchi Veynaldum bo‘ldi. Unga “Barselona” ham qiziqish bildirgandi. Niderlandiyalik transferi haqida gapirar ekan, Parij klubining qat’iyatliroq harakat qilganini aytdi, u haq: chunki “PSJ” unga “Barselona”ga qaraganda ikki baravar ko‘proq maosh taklif qilgan. Maurisio Pochettino (“PSJ” bosh murabbiyi) esa uzoq vaqtdan beri o‘z jamoasida ko‘rishni istagan futbolchiga ega bo‘ldi. Endilikda uning ixtiyorida juda kuchli tarkib bor. Murabbiyga barcha yulduzlarga maydondan joy topib berish oson bo‘lmasligi aniq.
Erik Garsiya, “Barselona”
Transfer narxi: 20 million yevro
Garchi, Xosep Gvardiola uni doimo maqtagan bo‘lsa ham, Garsiya “Manchester Siti”da umuman o‘ynamasdi. Balki yosh futbolchiga shartnomani yangilashni xohlamagani uchun o‘yin amaliyoti berilmagandir. Buning ustiga Ruben Diash va Aymerik Lyaportdan birini raqobatda yutib chiqish ham qiyin edi. Umuman olganda, “Siti” uning ketganidan afsusda emas, lekin “Barselona” uchun bu transfer juda muhim bo‘ldi: Samyuel Umtitining boshi jarohatdan chiqmaydi, Kleman Langlega qat’iyat yetishmaydi, Xerard Pikening esa eng yaxshi yillari ortda qolgan. Shunday ekan, bu yerdagi raqobatda g‘olib chiqish osonroq bo‘lish ehtimoli ancha yuqori.
Serxio Aguero, “Barselona”
Transfer narxi: 18 million yevro
“Barselona” pulsiz qolganiga qaramay erkin agentlar bozorida o‘zini ko‘rsata oldi. Aguero nima uchun “Barselona”ga o‘tgani aniq edi va u aynan shuning uchun maoshining ikki baravar kamayishiga ham rozi bo‘lgandi. Biroq kutilmaganda hammasi o‘zgarib ketdi...
Lionel Messi jamoadan ketganiga qaramay Ronald Kumanda hujumchilar borasida muammo yo‘q deyish mumkin: Memfis Depay, Serxio Aguero, Ansu Fati, Antuan Grizmann, Usmon Dembele va Martin Breytueyt.
Mavzuga doir: Messining “Barselona”dan ketishi Aguero uchun baxtsizlik. Argentinalik hujumchilarning do‘stligi tarixi
Transfer narxi: 10 million yevro
“PSJ” Tiago Silvani tekinga qo‘yib yuborganidan bir yil o‘tib, 35 yoshli Serxio Ramosni o‘z safiga qo‘shib oldi. “Real” bilan kelisha olmagan himoyachiga yillik 12 million yevro taklif qilindi. Qanchalik ishonish qiyin bo‘lmasin, Madrid afsonasi endi “PSJ” sharafini himoya qiladi va ehtimol qizil kartochka ham olar.
Lionel Messi, “PSJ”
Transfer narxi: 80 million yevro
Lionel Messi 2020-yilning yozida klub rahbariyatidan norozi bo‘lib, jamoadan ketmoqchi bo‘lgandi, biroq qadrdon klubi bilan sudlashmaslik uchun Kataloniyada qolishga majbur bo‘ladi. Ammo oradan bir yil o‘tib, o‘zi xohlasa-da jamoada qololmadi. Bunga klub rahbariyatining noshudligi va La Liga qoidalari yo‘l qo‘ymadi. Shu tariqa Messi butun umri davomida o‘ynagan klubini tark etdi. Bundan esa yana o‘sha uddaburon “PSJ” foydalanib qoldi. Endilikda Parij klubining nafaqat himoyasiga, balki avvaldan zo‘r bo‘lgan hujum chizig‘iga ham shunchaki havas qilish kamlik qiladi.
Bonus: “qariya” erkin agentlar
Bu yozda o‘z faoliyatida o‘zgarish qilishga qaror qilgan taniqli “qariya”lar ham ko‘p bo‘ldi. Katta yoshdagi futbolchilarning transfer narxi yoshiga mos ravishda past, ammo bu ularni eslamaslik uchun sabab bo‘la olmaydi, shunday emasmi?
- Janluiji Buffon faoliyatini “Parma”da yakunlash qaror qildi.
- Xavi Martines “Bavariya”ni tark etdi va Qatarga yo‘l oldi.
- Marek Hamshik Xitoydan qaytdi. U faoliyatini “Trabzonspor”da davom ettiradi.
- Kevin Gameyro qadrdon klubi “Strasbur”ga qaytdi.
- Kevin-Prins Boateng ham butsilarini qadrdon jamoasida mixga ilishga qaror qildi. U endi “Herta” safida javlon uradi.
- Karlos Bakka “Vilyarreal”dan “Granada”ga ko‘chib o‘tdi.
- Roberto Soldado endi “Levante”da. U o‘tgan mavsumda barcha musobaqalarda 15 ta gol urgandi.
- Eshli Yang “Inter”dan Angliyaga qaytdi va “Aston Villa” bilan kelishuvga erishdi. U “Manchester Yunayted”ga o‘tguniga qadar qadar to‘rt yil ushbu klub sharafini himoya qilgandi.
- Mario Balotelli Turkiyaning “Adana Demirspor” klubiga yo‘l oldi. Bir paytlar “Super Mario” bo‘lgan hujumchi hozir 30 yoshda.
Izoh (0)