Коронавирус пандемияси туфайли аксарият клублар қиммат трансферларни амалга ошира олмади. Бироқ инқироз даври бўлишига қарамай барибир таркибни кучайтириш керак, шу боис ушбу ёзда футболчиларни эркин агент сифатида ўз сафига қўшиб олиш ҳолатлари кўпайди. Эркин агент деганда собиқ клублари билан шартномаси тугаган ва уни узайтирмаган футболчилар тушунилади. Одатда ўртамиёна футболчилар эркин агент сифатида жамоасини ўзгартирарди. Аммо бу сафар эркин агентларнинг аксарияти юлдуз даражасидаги футболчилар бўлди. «Чемпионат» Transfermarkt порталига таяниб, трансфер нархи 10 миллион евродан юқори бўлган футболчиларни (эркин агентларни) бир саҳифага жамлади. Айтиш мумкинки, ушбу трансфер ойнасида «Милан» шунчаки тўнаб кетилди.
Жанлуижи Доннарумма, «ПСЖ»
Трансфер нархи: 60 миллион евро
«Милан» ўз тарбияланувчиси учун, тахминан, саккиз миллион евро маош таклиф қилди, аммо дарвозабон 12 миллион сўради. Бу сумма эса клуб учун кўплик қилди. Шу тариқа Евро—2020 ўртасида Доннарумма эркин агентга айланди. Вазиятни кузатаётган «ПСЖ» дарҳол ишга киришди ва италиялик посбонга ўзи хоҳлаган маошни таклиф қилди. Ушбу вазиятда «ПСЖ»нинг қарорини тушуниш қийин, чунки жамоада Кейлор Навасдек етук дарвозабон бор эди.
Мавзуга доир: Доннарумманинг нархи 6 йилда 120 бараварга ошди. «ПСЖ» Евро—2020 нинг энг яхши ўйинчисини текинга қўлга киритгани ҳақида
Трансфер нархи: 55 миллион евро
Марказий ва чап қанот ҳимоячиси «Бавария» билан янги шартнома борасида келиша олмади ва «Реал»га йўл олди. Мюнхен клуби очиқчасига ундан норози эканини билдирди, Оливер Кан клуб футболчига анчайин «ёғли» шартнома таклиф қилганини айтди. Алабанинг ўзи эса ҳар доим «Реал»нинг афсонавий оқ либосида ўйнашни хоҳлаганини таъкидлади. Австриялик бу ҳақида гапирмаса ҳам, маоши сезиларли даражада «жозибали»: йилига 12 миллион евро. Мадридликлар учун эса бу шунчаки ажойиб трансфер.
Мемфис Депай, «Барселона»
Трансфер нархи: 45 миллион евро
Каталонияликларнинг катта молиявий муаммолари бор, лекин кўплаб футболчилар ҳамон бу жамоада ўйнашни хоҳлайди. Депай Месси билан ўйнаш учун ҳатто «Лион»даги маошидан камроққа ҳам рози бўлганди, бироқ унга даҳо билан бирга тўп тепиш насиб этмади. Нидерландиялик ҳужумчи сўнгги мавсумларда ўзини кўрсатмоқда, ҳозир у 27 ёшда ва айтиш мумкинки, фаолиятининг энг юқори чўққисида.
Хоқон Чалхонўғлу, «Интер»
Трансфер нархи: 35 миллион евро
Ушбу ёзда «Милан»ни текинга тарк этган яна бир кучли футболчи Хоқон бўлди. Унинг жамоадан кетганидан мухлисларнинг хурсанд бўлиши даргумон, лекин клуб Хоқоннинг маошини ошириш ҳақидаги истагини рад этди. Натижада туркиялик ҳеч иккиланмасдан жамоасини ўзгартирди: янги мавсумни у «Интер» сафида бошлади. «Интер» эса зудлик билан Евро—2020 да ҳушидан кетган Кристиан Эриксенга ўринбосар топиши керак эди. Клуб бу ишни бир евро ҳам сарфламаган ҳолда бажарди.
Жоржино Вейналдум, «ПСЖ»
Трансфер нархи: 30 миллион евро
Парижликлар текинга қўлга киритган яна бир юқори даражали футболчи Вейналдум бўлди. Унга «Барселона» ҳам қизиқиш билдирганди. Нидерландиялик трансфери ҳақида гапирар экан, Париж клубининг қатъиятлироқ ҳаракат қилганини айтди, у ҳақ: чунки «ПСЖ» унга «Барселона»га қараганда икки баравар кўпроқ маош таклиф қилган. Маурисио Почеттино («ПСЖ» бош мураббийи) эса узоқ вақтдан бери ўз жамоасида кўришни истаган футболчига эга бўлди. Эндиликда унинг ихтиёрида жуда кучли таркиб бор. Мураббийга барча юлдузларга майдондан жой топиб бериш осон бўлмаслиги аниқ.
Эрик Гарсия, «Барселона»
Трансфер нархи: 20 миллион евро
Гарчи, Хосеп Гвардиола уни доимо мақтаган бўлса ҳам, Гарсия «Манчестер Сити»да умуман ўйнамасди. Балки ёш футболчига шартномани янгилашни хоҳламагани учун ўйин амалиёти берилмагандир. Бунинг устига Рубен Диаш ва Аймерик Ляпортдан бирини рақобатда ютиб чиқиш ҳам қийин эди. Умуман олганда, «Сити» унинг кетганидан афсусда эмас, лекин «Барселона» учун бу трансфер жуда муҳим бўлди: Самюуэль Умтитининг боши жароҳатдан чиқмайди, Клеман Ланглега қатъият етишмайди, Херард Пикенинг эса энг яхши йиллари ортда қолган. Шундай экан, бу ердаги рақобатда ғолиб чиқиш осонроқ бўлиш эҳтимоли анча юқори.
Серхио Агуэро, «Барселона»
Трансфер нархи: 18 миллион евро
«Барселона» пулсиз қолганига қарамай эркин агентлар бозорида ўзини кўрсата олди. Агуэро нима учун «Барселона»га ўтгани аниқ эди ва у айнан шунинг учун маошининг икки баравар камайишига ҳам рози бўлганди. Бироқ кутилмаганда ҳаммаси ўзгариб кетди...
Лионель Месси жамоадан кетганига қарамай Рональд Куманда ҳужумчилар борасида муаммо йўқ дейиш мумкин: Мемфис Депай, Серхио Агуэро, Ансу Фати, Антуан Гризманн, Усмон Дембеле ва Мартин Брэйтуэйт.
Мавзуга доир: Мессининг «Барселона»дан кетиши Агуэро учун бахтсизлик. Аргентиналик ҳужумчиларнинг дўстлиги тарихи
Трансфер нархи: 10 миллион евро
«ПСЖ» Тиаго Сильвани текинга қўйиб юборганидан бир йил ўтиб, 35 ёшли Серхио Рамосни ўз сафига қўшиб олди. «Реал» билан келиша олмаган ҳимоячига йиллик 12 миллион евро таклиф қилинди. Қанчалик ишониш қийин бўлмасин, Мадрид афсонаси энди «ПСЖ» шарафини ҳимоя қилади ва эҳтимол қизил карточка ҳам олар.
Лионель Месси, «ПСЖ»
Трансфер нархи: 80 миллион евро
Лионель Месси 2020 йилнинг ёзида клуб раҳбариятидан норози бўлиб, жамоадан кетмоқчи бўлганди, бироқ қадрдон клуби билан судлашмаслик учун Каталонияда қолишга мажбур бўлади. Аммо орадан бир йил ўтиб, ўзи хоҳласа-да жамоада қололмади. Бунга клуб раҳбариятининг ношудлиги ва Ла Лига қоидалари йўл қўймади. Шу тариқа Месси бутун умри давомида ўйнаган клубини тарк этди. Бундан эса яна ўша уддабурон «ПСЖ» фойдаланиб қолди. Эндиликда Париж клубининг нафақат ҳимоясига, балки аввалдан зўр бўлган ҳужум чизиғига ҳам шунчаки ҳавас қилиш камлик қилади.
Бонус: «қария» эркин агентлар
Бу ёзда ўз фаолиятида ўзгариш қилишга қарор қилган таниқли «қария»лар ҳам кўп бўлди. Катта ёшдаги футболчиларнинг трансфер нархи ёшига мос равишда паст, аммо бу уларни эсламаслик учун сабаб бўла олмайди, шундай эмасми?
- Жанлуижи Буффон фаолиятини «Парма»да якунлаш қарор қилди.
- Хави Мартинес «Бавария»ни тарк этди ва Қатарга йўл олди.
- Марек Ҳамшик Хитойдан қайтди. У фаолиятини «Трабзонспор»да давом эттиради.
- Кевин Гамейро қадрдон клуби «Страсбур»га қайтди.
- Кевин-Принс Боатенг ҳам бутсиларини қадрдон жамоасида михга илишга қарор қилди. У энди «Ҳерта» сафида жавлон уради.
- Карлос Бакка «Вильярреал»дан «Гранада»га кўчиб ўтди.
- Роберто Сольдадо энди «Леванте»да. У ўтган мавсумда барча мусобақаларда 15 та гол урганди.
- Эшли Янг «Интер»дан Англияга қайтди ва «Астон Вилла» билан келишувга эришди. У «Манчестер Юнайтед»га ўтгунига қадар қадар тўрт йил ушбу клуб шарафини ҳимоя қилганди.
- Марио Балотелли Туркиянинг «Адана Демирспор» клубига йўл олди. Бир пайтлар «Супер Марио» бўлган ҳужумчи ҳозир 30 ёшда.
Изоҳ (0)