Bayden AQSh qo‘shinlarini Afg‘onistondan olib chiqish haqidagi qarorini tushuntirdi

AQSh prezidenti Jo Bayden Amerika qo‘shinlarini Afg‘onistondan olib chiqish to‘g‘risidagi qarorini ushbu kampaniyada yo‘qotilgan AQSh harbiylarining ro‘yxati bilan izohladi. Bu haqda Oq uyga tayanib, “RBK” xabar berdi.

Baydenning so‘zlariga ko‘ra, u jiddiy qaror qabul qilishi kerak edi: yo AQShni unga kuniga 150-300 million dollarga tushgan 20 yillik urushdan olib chiqishi yoki Amerika kuchlari sonini ko‘paytirib, kampaniyani davom ettirishi kerak edi.

“Bu kartochkani har kuni yonimda olib yuraman — biz yo‘qotgan odamlar ro‘yxati: 2448 amerikalik o‘ldi, 20 722 kishi yaralandi… Va men urushni tugatishga qaror qildim”, — dedi Bayden qaydnomaga qarab.

Shuningdek, Baydenning so‘zlariga ko‘ra, AQSh Afg‘onistondagi harbiy amaliyotini davom ettirsa, Rossiya va Xitoy bundan xursand bo‘lardi.

“Tasavvur qiling, siz Moskva yoki Pekindasiz. Bizning Afg‘onistondan ketishimizdan mamnun bo‘larmidingiz yoki yo‘q?” — deya so‘radi u jurnalistdan Oq uyda o‘tkazilgan matbuot anjumanida. Shundan so‘ng Bayden kuldi hamda AQSh afg‘on mojarosiga uzoq vaqtga o‘ralashib qolganini ko‘rganda Moskva va Pekin xursand bo‘lgan bo‘lardi, dedi.

AQSh Afg‘onistonni tark etishidan Rossiya Federatsiyasi va Xitoy mamnun emas, degan fikrni Bayden va uning ma’muriyatidagi ba’zi kishilar ilgari ham aytgan. Shu bilan birga, ko‘plab G‘arb ekspertlari Xitoy, aksincha hozir Afg‘onistondagi ta’sirini kengaytirish va u yerda iqtisodiy loyihalarini amalga oshirish imkoniyatiga ega bo‘lganini qayd etmoqda. Bundan tashqari, yevropalik va amerikalik ekspertlarning ta’kidlashicha, AQShdan farqli o‘laroq Rossiya ham, Xitoy ham, aftidan, “Tolibon” Afg‘onistonda hokimiyat tepasiga kelganidan ajablanmagan.

Aprel oyida Bayden Amerika qo‘shinlarining barchasini Nyu-York va Vashingtonda 2001-yil 11-sentabrda yuz bergan teraktlarga 20 yil to‘ladigan kungacha olib chiqib ketishni va’da qilgan edi. Keyinroq muddat 31-avgustga surildi. Iyulga kelib Afg‘onistondan AQSh harbiy kontingentining 90 foizi chiqib ketdi. Shundan keyin “Tolibon” hukumat harbiy kuchlariga qarshi hujumlarni kuchaytirdi. 15-avgust kuni jangarilar Kobuldagi prezident saroyiga kirdi va Afg‘onistonni to‘liq egallab olganini e’lon qildi. Prezident Ashraf G‘ani mamlakatdan qochib ketdi.