Bayden qanday holatda “Tolibon”ga qarshi sanksiyalar joriy etilishini ma’lum qildi

AQSh prezidenti Jo Baydenning ma’lum qilishicha, “Tolibon”ga qarshi sanksiyalar joriy etish to‘g‘risidagi qaror harakat a’zolarining xatti-harakatlariga bog‘liq bo‘ladi. Bayden bu haqda Oq uydagi matbuot anjumanida aytib o‘tdi.

Buyuk Britaniya qattiq talab qilayotgani bois Bayden ham “Tolibon”ga qarshi muayyan sharoitlarda sanksiyalarni qo‘llab-quvvatlaydimi, degan savolga davlat rahbari “ha” deb javob berdi. “Bu ularning xatti-harakatlariga bog‘liq”, — qo‘shimcha qildi u.

Prezidentning ta’kidlashicha, “Tolibon” hozircha AQSh kuchlariga qarshi harakat qilmagan, shuningdek, amerikaliklarning evakuatsiya uchun Kobul aeroportiga kirishiga to‘sqinlik qilmaslik haqidagi va’dalarida “hozircha sodiq turibdi”.

Bayden endi “Tolibon”ga ishonadimi yoki yo‘qmi, degan savolga davlat rahbari: “Men hech kimga, jumladan, sizga ham ishonmayman”, — deb javob berdi.

“Tolibon” hokimiyatga kelishiga sabab bo‘lgan AQSh qo‘shinlarini Afg‘onistondan olib chiqish qarori haqida gapirar ekan, Bayden bu to‘g‘ri qaror ekanini ta’kidladi. “Men o‘ylayotgan fikr tarixda qoladi, bu mantiqiy, oqilona va to‘g‘ri qaror edi. Mening vazifam — hech kim qabul qilmaydigan yoki qabul qilishni xohlamaydigan qarorlarni qabul qilish. Men shunday qildim va ishonchim komilki, urushga yangi ayollar va erkaklarni yubormaslik haqidagi ushbu qarorda men butunlay haqman. Urushga borish uchun, aslida, endi hech qanday sabab yo‘q edi”.

Buyuk Britaniya dunyo yetakchilarini “Tolibon”ga qarshi yangi sanksiyalar kiritish masalasini ko‘rib chiqishga jalb qilmoqchi. London 24-avgust kuni bo‘lib o‘tadigan G7 mamlakatlari yig‘ilishida cheklovlarni muhokama qilishni rejalashtirmoqda.

Britaniyaning fikricha, “Tolibon” inson huquqlarini buzsa va jangarilarga o‘z hududidan boshpana sifatida foydalanishga ruxsat bersa, AQSh, Italiya, Fransiya, Germaniya, Yaponiya va Kanadadan iborat G7 iqtisodiy sanksiyalar joriy etish va yordamni to‘xtatish masalasini ko‘rib chiqishi kerak.

“Xalqaro hamjamiyat xavfsiz evakuatsiyani ta’minlash, gumanitar inqirozning oldini olish va afg‘on xalqini qo‘llab-quvvatlash, so‘nggi 20 yil ichida erishilgan yutuqlarni mustahkamlash uchun birgalikda harakat qilishi juda muhim”, — dedi Buyuk Britaniya bosh vaziri Boris Jonson.

O‘tgan hafta Bayden G7 yetakchilari “Tolibon”ga qarshi birgalikdagi yondashuvni ishlab chiqishini aytgandi. Shuningdek, uning ma’lum qilishicha, Jonson Germaniya kansleri Angela Merkel, Fransiya prezidenti Emmanuel Makron va Italiya bosh vaziri Mario Dragi bilan ikki tomonlama muzokaralar o‘tkazgan.

Britaniya matbuoti xabariga ko‘ra, Jonson ko‘proq odamlarni evakuatsiya qilish uchun Baydenni Amerika harbiylarini Afg‘onistondan olib chiqish muddatini uzaytirishga undamoqchi. 22-avgust kuni Bayden AQSh harbiylarini Afg‘onistondan olib chiqish muddatini uzaytirish masalasini muhokama qilayotganini aytdi, lekin bunga zarurat bo‘lmasligiga umid bildirdi. Uning so‘zlariga ko‘ra, Vashington G7 ittifoqchilarining so‘roviga binoan muddatni uzaytirishi mumkin.

O‘tgan hafta Buyuk Britaniya tashqi ishlar vaziri Dominik Raab “Tolibon”ga bosim o‘tkazish uchun sanksiyalar joriy etish ehtimolini e’lon qildi. G‘arb diplomatlaridan biriga ko‘ra, “Tolibon”ga qarshi sanksiyalarning darhol kuchga kirishi dargumon.