O‘zbekistonda 5 ming va 10 ming so‘mlik banknotalar yangi ko‘rinishda chiqarilishi haqida xabar berilgan edi. Markaziy bank ushbu banknotalar dizaynini taqdim etdi va 2021-yilning 26-avgustidan boshlab muomalaga chiqarilishini ma’lum qildi. Markaziy bank mas’ul xodimi Zafar Asadov 5 ming va 10 ming so‘mlik banknotlar nega yangi shaklga o‘tkazilayotganiga aniqlik kiritdi.
Uning aytishicha, jahon amaliyotida banknotalar bosish texnologiyasi doimiy ravishda yangilanib boradi. O‘zbekistonda banknot va tangalar boshqa davlatlardan farqli ravishda mamlakatning o‘zida, ya’ni Markaziy bank saqlovidagi “Davlat belgisi” DUK tomonidan tayyorlanadi.
Bugungi kunda “Davlat belgisi” DUKda modernizatsiya qilish amalga oshirilgani sababli banknotalarda ham zamonaviy himoya elementlarini qo‘llash va har xil formatlarda raqamlash imkoni yaratildi.
Yangi banknotlarda avvalgisidan farqli ravishda, ko‘rish qobiliyati past bo‘lgan kishilar uchun banknota nominal qiymatini bilish imkonini beruvchi maxsus element ham joylashtirilgan.
Bundan tashqari, 5 ming va 10 ming so‘mlik banknotalar yangi ko‘rinishda chiqarilishiga banknotlarni yagona tematikaga birlashtirish maqsadi ham sabab bo‘lganini aytib o‘tdi.
“Jahon amaliyotida hamma mamlakatlar banknotalarini tasvirlash yagona bir mavzu atrofida mujassamlashgan. Bizning banknotalarimizning ham dizayni yagona mavzuga mujassamlashtirish maqsad qilingan bo‘lib, bu mavzu Buyuk ipak yo‘li va mamalakatning qadimiy tarixiga qaratilgan”, — dedi Markaziy bank mas’ul xodimi va iyun oyida chiqarilgan 2 ming va 20 ming so‘mlik banknotalar ham shu mavzuga bag‘ishlanganini ta’kidlab o‘tdi.
Uning bildirishicha, kelgusida faqat yangi ko‘rinishdagi banknotlar muomalaga chiqariladi. Muomalaga chiqarilayotgan yangi ko‘rinishdagi qiymati 5000 so‘m va 10 000 so‘m bo‘lgan pul belgilari bugungi kunda muomalada bo‘lgan 2013-yil namunasidagi 5000 so‘mlik va 2017-yil namunasidagi 10 000 so‘mlik banknotlar bilan bir qatorda (parallel ravishda) muomalada bo‘ladi, ya’ni 2013-yil va 2017-yil namunasidagi 5000 so‘mlik va 10 000 so‘mlik banknotlar ham to‘lov qobiliyatini yo‘qotmaydi.
“Avvalgi ko‘rinishdagi banknotlar muomalada yurishi va aholi tomonidan hisob-kitobda foydalanish mumkinligi sababli yangi ko‘rinishdagi banknotlarni muomalaga chiqarish hech qanday qo‘shimcha sarf-xarajatlar talab etmaydi”, — degan Markaziy bank mas’ul xodimi.
Izoh (0)