Ўзбекистонда 5 минг ва 10 минг сўмлик банкноталар янги кўринишда чиқарилиши ҳақида хабар берилган эди. Марказий банк ушбу банкноталар дизайнини тақдим этди ва 2021 йилнинг 26 августидан бошлаб муомалага чиқарилишини маълум қилди. Марказий банк масъул ходими Зафар Асадов 5 минг ва 10 минг сўмлик банкнотлар нега янги шаклга ўтказилаётганига аниқлик киритди.
Унинг айтишича, жаҳон амалиётида банкноталар босиш технологияси доимий равишда янгиланиб боради. Ўзбекистонда банкнот ва тангалар бошқа давлатлардан фарқли равишда мамлакатнинг ўзида, яъни Марказий банк сақловидаги «Давлат белгиси» ДУК томонидан тайёрланади.
Бугунги кунда «Давлат белгиси» ДУКда модернизация қилиш амалга оширилгани сабабли банкноталарда ҳам замонавий ҳимоя элементларини қўллаш ва ҳар хил форматларда рақамлаш имкони яратилди.
Янги банкнотларда аввалгисидан фарқли равишда, кўриш қобилияти паст бўлган кишилар учун банкнота номинал қийматини билиш имконини берувчи махсус элемент ҳам жойлаштирилган.
Бундан ташқари, 5 минг ва 10 минг сўмлик банкноталар янги кўринишда чиқарилишига банкнотларни ягона тематикага бирлаштириш мақсади ҳам сабаб бўлганини айтиб ўтди.
«Жаҳон амалиётида ҳамма мамлакатлар банкноталарини тасвирлаш ягона бир мавзу атрофида мужассамлашган. Бизнинг банкноталаримизнинг ҳам дизайни ягона мавзуга мужассамлаштириш мақсад қилинган бўлиб, бу мавзу Буюк ипак йўли ва мамалакатнинг қадимий тарихига қаратилган», — деди Марказий банк масъул ходими ва июнь ойида чиқарилган 2 минг ва 20 минг сўмлик банкноталар ҳам шу мавзуга бағишланганини таъкидлаб ўтди.
Унинг билдиришича, келгусида фақат янги кўринишдаги банкнотлар муомалага чиқарилади. Муомалага чиқарилаётган янги кўринишдаги қиймати 5000 сўм ва 10 000 сўм бўлган пул белгилари бугунги кунда муомалада бўлган 2013 йил намунасидаги 5000 сўмлик ва 2017 йил намунасидаги 10 000 сўмлик банкнотлар билан бир қаторда (параллел равишда) муомалада бўлади, яъни 2013 йил ва 2017 йил намунасидаги 5000 сўмлик ва 10 000 сўмлик банкнотлар ҳам тўлов қобилиятини йўқотмайди.
«Аввалги кўринишдаги банкнотлар муомалада юриши ва аҳоли томонидан ҳисоб-китобда фойдаланиш мумкинлиги сабабли янги кўринишдаги банкнотларни муомалага чиқариш ҳеч қандай қўшимча сарф-харажатлар талаб этмайди», — деган Марказий банк масъул ходими.
Изоҳ (0)