Italiyaliklarning siz kutmagan odatlari va mamlakatni butunlay boshqa tomondan ochib beruvchi qiziqarli faktlar

Ko‘pchilik Italiyani go‘zal joylari, mazali oshxonalari, zamonaviy uylari va mamlakat chegaralari konturli geografik xaritada etikka o‘xshashi bilan yodga oladi. Biroq bu davlatda ko‘plab kutilmagan hodisalar ham mavjud. AdMe nashri quyidagi ma’lumotlar asosida Italiyani butunlay boshqa tomondan ko‘rsatishga harakat qildi.

Italiyada “toza likoplar jamiyati” mavjud

Mazali taomdan so‘ng Italiya aholisi “fare la scarpetta” deb nomlangan harakatni amalga oshiradilar. Bunda bir bo‘lak non bilan qolgan sousni yig‘ib, yeb qo‘yadilar. Har bir oshpaz uchun xo‘randa qaytargan toza idish har qanday maqtovdan ko‘ra yoqimliroqdir.

O‘n yillar davomida bu odatni sevuvchilar va estetikaga amal qiluvchilar o‘rtasida buni uydan tashqarida qilish qanchalik o‘rinli ekanligi haqida munozaralar bo‘lib kelgan. Natijada ovqat shinavandalari g‘alaba qozonishdi. Italiya odobi shuni ko‘rsatadiki, qolgan sousni bir bo‘lak non bilan yig‘ib yeyish maqsadga muvofiq, lekin sanchqi yordamida. Biroq mahalliy aholi agar ular rasmiy tadbirda bo‘lmasa, baribir qaysarlik bilan buni qo‘lda qiladilar.

Italiyada o‘ziga xos kasalliklar mavjud

Italiyaliklar bir qator kasalliklarni o‘ziga xos tarzda tushuntira oladilar. Shifokorga borishni talab qilmaydigan o‘zini yomon his qilish “hammasi yelvizakdan” yoki “fasllar o‘zgarib turadi” iboralari bilan ifodalanadi. Bunday tashxis tananing har qanday joyidagi kasalliklar uchun universaldir. Agar mahalliy odam “Meni jodugar urdi” desa, uni xurofotchi deb o‘ylamang. Bu shunchaki og‘ir qutini keskin ko‘targanda uning beli qotib qolganligini anglatadi.

Hojatxona suvini tushirish ham sayyohlar uchun yana bir vazifa

Italiyadagi umumiy hojatxonalarda tashrif buyuruvchilar drenaj tugmachasini topishga ko‘p vaqt sarflashlari mumkin. Suv bakini ko‘pchilik uchun odatiy joyga — hojatxonaning yoniga qo‘yish bu yerda odat emas. Uni eski usulda to‘g‘ridan to‘g‘ri shiftga osib qo‘yish me’yor hisoblanadi. Suvni tushirish uchun bakka osilgan zanjirni tortish lozim.

Plyajda dengiz chig‘anog‘ini yig‘ganlik uchun jarimaga tortilish mumkin

Italiya aholisi iloji boricha o‘z vatanining tabiatini saqlab qolishga intiladi. Shuning uchun ba’zi joylarda, masalan, Sardiniyada, qirg‘oq bo‘yi alohida himoyada. Suvenir sifatida olingan chig‘anoqli oq qum uchun sayyohlarga jarima solinadi yoki hibsga olinadi.

G‘iybat qilish — ijtimoiy hayotning muhim qismi

Mahalliy aholi o‘z tanishlari haqida bemalol g‘iybat qilishadi. Ular buni odatda yomon niyatsiz qiladilar. Shunchaki, italiyaliklar norasmiy muloqotni yaxshi ko‘radilar va bunday suhbatlar begonalar o‘rtasida ham aloqa o‘rnatadi, muammolardan chalg‘itishga yordam beradi. Erkaklar ham, ayollar ham tasodifiy suhbatdoshlar bilan qo‘shnilari va tanishlarining shaxsiy hayotini bemalol muhokama qilishadi, hamkasblarini rosa g‘iybat qilishadi.

Italiyaliklar qarishdan qo‘rqmaydi

Bu yerda pasportdagi raqam odam yoshini baholash mezoni sifatida qaralmaydi. Italiya aholisi uchun har qanday yosh qadrli. Ayollar ham, erkaklar ham 60-70 yoshda uchrashuvga yoki tungi klubga bormaslik uchun “poyezd ketib bo‘lgan” iborasini ishlatmaydi.

Italiyalik erkaklar his-tuyg‘ularini omma oldida ko‘rsatishdan uyalmaydi

Jamiyat jinsidan qat’i nazar, his-tuyg‘ularning har qanday ifodasini qoralamaydi. Erkaklar sevimli futbol jamoasidan ayrilishidan yoki filmning ta’sirli yakunlanishidan ko‘z yoshlarini tiyishga harakat qilishmaydi. Bundan tashqari, italiyaliklar yaxshi kayfiyatda quvnoq kulishi bilan birga, biror narsani yoqtirmasalar, juda g‘azablanishadi ham.

Italiyada unashtiruvdan to‘ygacha bo‘lgan muddatning  cho‘zilishi tabiiy hol

Italiyalik erkaklar odatda sevgan ayoliga osonlikcha va ikkilanmasdan turmush qurish taklifini berishadi. Ammo orzu qilingan uzukni taqish bilan to‘y o‘rtasida ko‘p yillar o‘tishi mumkin. Sevishganlar to‘yga tayyor bo‘lganda yakshanba kunini belgilashga harakat qilishadi: haftaning bu kuni juma kunidan farqli o‘laroq, eng qulay kun hisoblanadi.

Italiyaliklar ajrashgan taqdirda, sobiq turmush o‘rtog‘idan aliment talab qilishlari mumkin

Agar er-xotin ajrashishga qaror qilgan bo‘lsa, iqtisodiy jihatdan zaif tomon aliment to‘lashni talab qilishi mumkin. Uning miqdori alohida holatda sud tomonidan belgilanadi. Aliment to‘lash muddati faqat oluvchi yana turmushga chiqishi bilan cheklanadi.

Italiyaga ko‘chib o‘tganingiz uchun sizga 28 ming yevro to‘lanishi mumkin

Italiyaliklar qadimgi qishloqlarning yo‘q bo‘lib ketishidan xavotirda. Shu bois hukumat mamlakatga joylashishni istaganlarni moliyaviy qo‘llab-quvvatlashga tayyor. Faqat bir shart bilan — yangi kelganlar kichik aholi punktlariga joylashsalar va yaqin kelajakda turizm xizmatlarini ko‘rsatish, qishloq xo‘jaligi yoki hunarmandchilik bilan shug‘ullanadigan kichik biznes ochsalargina, bunday imkoniyatdan foydalanishlari mumkin.