Италияликларнинг сиз кутмаган одатлари ва мамлакатни бутунлай бошқа томондан очиб берувчи қизиқарли фактлар

Кўпчилик Италияни гўзал жойлари, мазали ошхоналари, замонавий уйлари ва мамлакат чегаралари контурли географик харитада этикка ўхшаши билан ёдга олади. Бироқ бу давлатда кўплаб кутилмаган ҳодисалар ҳам мавжуд. AdMe нашри қуйидаги маълумотлар асосида Италияни бутунлай бошқа томондан кўрсатишга ҳаракат қилди.

Италияда «тоза ликоплар жамияти» мавжуд

Мазали таомдан сўнг Италия аҳолиси “fare la scarpetta” деб номланган ҳаракатни амалга оширадилар. Бунда бир бўлак нон билан қолган соусни йиғиб, еб қўядилар. Ҳар бир ошпаз учун хўранда қайтарган тоза идиш ҳар қандай мақтовдан кўра ёқимлироқдир.

Ўн йиллар давомида бу одатни севувчилар ва эстетикага амал қилувчилар ўртасида буни уйдан ташқарида қилиш қанчалик ўринли эканлиги ҳақида мунозаралар бўлиб келган. Натижада овқат шинавандалари ғалаба қозонишди. Италия одоби шуни кўрсатадики, қолган соусни бир бўлак нон билан йиғиб ейиш мақсадга мувофиқ, лекин санчқи ёрдамида. Бироқ маҳаллий аҳоли агар улар расмий тадбирда бўлмаса, барибир қайсарлик билан буни қўлда қиладилар.

Италияда ўзига хос касалликлар мавжуд

Италияликлар бир қатор касалликларни ўзига хос тарзда тушунтира оладилар. Шифокорга боришни талаб қилмайдиган ўзини ёмон ҳис қилиш «ҳаммаси елвизакдан» ёки «фасллар ўзгариб туради» иборалари билан ифодаланади. Бундай ташхис тананинг ҳар қандай жойидаги касалликлар учун универсалдир. Агар маҳаллий одам «Мени жодугар урди» деса, уни хурофотчи деб ўйламанг. Бу шунчаки оғир қутини кескин кўтарганда унинг бели қотиб қолганлигини англатади.

Ҳожатхона сувини тушириш ҳам сайёҳлар учун яна бир вазифа

Италиядаги умумий ҳожатхоналарда ташриф буюрувчилар дренаж тугмачасини топишга кўп вақт сарфлашлари мумкин. Сув бакини кўпчилик учун одатий жойга — ҳожатхонанинг ёнига қўйиш бу ерда одат эмас. Уни эски усулда тўғридан-тўғри шифтга осиб қўйиш меъёр ҳисобланади. Сувни тушириш учун бакка осилган занжирни тортиш лозим.

Пляжда денгиз чиғаноғини йиғганлик учун жаримага тортилиш мумкин

Италия аҳолиси иложи борича ўз ватанининг табиатини сақлаб қолишга интилади. Шунинг учун баъзи жойларда, масалан, Сардинияда, қирғоқ бўйи алоҳида ҳимояда. Сувенир сифатида олинган чиғаноқли оқ қум учун сайёҳларга жарима солинади ёки ҳибсга олинади.

Ғийбат қилиш — ижтимоий ҳаётнинг муҳим қисми

Маҳаллий аҳоли ўз танишлари ҳақида бемалол ғийбат қилишади. Улар буни одатда ёмон ниятсиз қиладилар. Шунчаки, италияликлар норасмий мулоқотни яхши кўрадилар ва бундай суҳбатлар бегоналар ўртасида ҳам алоқа ўрнатади, муаммолардан чалғитишга ёрдам беради. Эркаклар ҳам, аёллар ҳам тасодифий суҳбатдошлар билан қўшнилари ва танишларининг шахсий ҳаётини бемалол муҳокама қилишади, ҳамкасбларини роса ғийбат қилишади.

Италияликлар қаришдан қўрқмайди

Бу ерда паспортдаги рақам одам ёшини баҳолаш мезони сифатида қаралмайди. Италия аҳолиси учун ҳар қандай ёш қадрли. Аёллар ҳам, эркаклар ҳам 60-70 ёшда учрашувга ёки тунги клубга бормаслик учун «поезд кетиб бўлган» иборасини ишлатмайди.

Италиялик эркаклар ҳис-туйғуларини омма олдида кўрсатишдан уялмайди

Жамият жинсидан қатъи назар, ҳис-туйғуларнинг ҳар қандай ифодасини қораламайди. Эркаклар севимли футбол жамоасидан айрилишидан ёки фильмнинг таъсирли якунланишидан кўз ёшларини тийишга ҳаракат қилишмайди. Бундан ташқари, италияликлар яхши кайфиятда қувноқ кулиши билан бирга, бирор нарсани ёқтирмасалар, жуда ғазабланишади ҳам.

Италияда унаштирувдан тўйгача бўлган муддатнинг  чўзилиши табиий ҳол

Италиялик эркаклар одатда севган аёлига осонликча ва иккиланмасдан турмуш қуриш таклифини беришади. Аммо орзу қилинган узукни тақиш билан тўй ўртасида кўп йиллар ўтиши мумкин. Севишганлар тўйга тайёр бўлганда якшанба кунини белгилашга ҳаракат қилишади: ҳафтанинг бу куни жума кунидан фарқли ўлароқ, энг қулай кун ҳисобланади.

Италияликлар ажрашган тақдирда, собиқ турмуш ўртоғидан алимент талаб қилишлари мумкин

Агар эр-хотин ажрашишга қарор қилган бўлса, иқтисодий жиҳатдан заиф томон алимент тўлашни талаб қилиши мумкин. Унинг миқдори алоҳида ҳолатда суд томонидан белгиланади. Алимент тўлаш муддати фақат олувчи яна турмушга чиқиши билан чекланади.

Италияга кўчиб ўтганингиз учун сизга 28 минг евро тўланиши мумкин

Италияликлар қадимги қишлоқларнинг йўқ бўлиб кетишидан хавотирда. Шу боис ҳукумат мамлакатга жойлашишни истаганларни молиявий қўллаб-қувватлашга тайёр. Фақат бир шарт билан — янги келганлар кичик аҳоли пунктларига жойлашсалар ва яқин келажакда туризм хизматларини кўрсатиш, қишлоқ хўжалиги ёки ҳунармандчилик билан шуғулланадиган кичик бизнес очсаларгина, бундай имкониятдан фойдаланишлари мумкин.