Turkiyaning barchaga tanish va mashhur qadamjolaridan tashqari, yana shunday joylari borki, ko‘plab sayyohlar uchun quyidagi ma’lumotlar qiziq bo‘lishi aniq.

Turkcha Maldiv orollari: Salda ko‘li

Foto: Getty Images

Mamlakatning janubida, Burdur viloyatida sayyohlar ajoyib manzaradan — oq qum va Salda ko‘lining maftunkor toza suvlaridan bahramand bo‘lishadi. Antaliyadan ko‘lga taxminan ikki soatda yetib borish mumkin. Tabiatning mazkur mo‘jizasi o‘rmon va tog‘lar orasida joylashgan, shuning uchun bu yerdagi havo harorati har doim qirg‘oqqa qaraganda 7-10 daraja past bo‘ladi.

Foto: Getty Images

Ko‘l, aslida, tog‘ plitalaridagi yoriqlarning tektonik kelib chiqishidan paydo bo‘lgan. Qum esa mineral gidromagnezitning tabiiy qatlamidan hosil bo‘lgan. Sohil bo‘yida tabiiy loy vannalarini topish mumkin: magniy miqdori yuqori bo‘lgan oq loy bo‘g‘imlar uchun juda foydali. Hozircha bu hudud sayyohlar bilan gavjum emas, bu yerda besh yulduzli mehmonxonalar yo‘q, faqat chodirli lagerlar va bir nechta kafe bor, xolos.

Issiq buloqli kurort va sanatoriylar: Dalaman, Yalova, Pamukkale

Foto: Getty Images

Turkiyadagi sog‘lomlashtirish oromgohlari ko‘pchilik sayyohlar uchun hali yaxshi tanish emas, ammo turklar orasida juda mashhur. Egey dengizi sohili Dalaman shahridagi mineral suv va tabiiy loylar nevrologik, oshqozon va yurak kasalliklarini davolaydi, stress va surunkali charchoqni ketkazadi. Buloqlar yaqinidagi sanatoriyda davolanish yoki plyaj sohilidagi mehmonxonada yashash va muolajalarga borish uchun barcha sharoitlar yetarli.

Foto: Getty Images

Yalova kurorti Istanbul yaqinida, tabiiy dendrologik parkda joylashgan. Bu yerda mineral buloqlari bo‘lgan mehmonxonalarni, shuningdek, yirik tibbiyot klinikalarini topish mumkin. Sayyohlar ginekologik muammolar, buyrak va teri kasalliklarini davolash, immunitetni yaxshilash va asab tizimini mustahkamlash uchun Yalovaga boradi. Pamukkalada 20 ga yaqin issiq buloq mavjud. Mutaxassislar mushak-skelet tizimi, yurak-qon tomir va teri kasalliklarini davolash uchun qaysi buloqlardan foydalanish kerakligini tavsiya qilishadi.

Havo sharida sayohat: Kappadokiya

Foto: Getty Images

Kappadokiyaga sayyohlar oqimi kamayganda borgan ma’qul: mart—aprel oylarida havo salqin bo‘ladi, sayyohlar ham ko‘p bo‘lmagani sababli manzaralardan to‘liq zavq olasiz. Bu yerlardagi g‘orlarda Vizantiyaning gullab-yashnagan davridan qolgan tasvirlarni uchratish mumkin. Agar ko‘proq ekzotikani xohlasangiz, tik qoya ustiga qurilgan mehmonxonaga tashrif buyuring.

Haqiqiy Turkiya: Istanbul

Foto: Getty Images

Frilanserlar va masofaviy ishlaydiganlar orasida Istanbulga bir-ikki oyga borish so‘nggi yillarda haqiqiy tendensiyaga aylandi. Bu yerda ijara narxi o‘rtacha, internet barqaror va arzon. Istanbul tasavvur qilganingizdan-da katta shahar: Beyog‘li markazida dam olishingiz, Beshiktoshda dengiz va parom manzaralaridan bahramand bo‘lishingiz, zerikkaningizda esa Shahzodalar oroliga sayohat uyushtirishingiz mumkin.

Xarid qilish: Bursa

Foto: Getty Images

Mamlakatning eng yirik shaharlaridan biri bo‘lgan Bursa turk to‘qimachilik poytaxtidir. Bu yerdagi rang-barang bozor va do‘konlardan matolar, to‘qimachilik buyumlari, kiyim-kechak va boshqa narsalarni ulgurji narxlarda topish mumkin. Turkiyaning eng yirik to‘qimachilik va tikuvchilik sanoati ushbu hududda joylashgan. Shaharning markazida mashhur Ipak bozori joylashgan. Bu yerdan Bursaning afsonaviy ipagidan tayyorlangan deyarli har qanday kiyim yoki aksessuarni topish mumkin.

Foto: Getty Images

Turkcha shopingda qancha narsa xarid qilishingiz emas, balki u yerdagi jarayon zavqlidir. Birorta do‘konda turkcha choyni lukum bilan asta-sekin ichish asnosida do‘kon egasi sizga butun mahsulotini namoyish etadi. Taassurotlar esa uzoq vaqtgacha sizni tark etmaydi.