Xorazmda plastik mahsulotlarni maydalovchi qo‘lbola “drobilka”ga tushib ketgan ayol vafot etdi. Holat bo‘yicha korxona rahbariga jinoyat ishi qo‘zg‘atilgan

Xorazm viloyati prokuraturasi ijtimoiy tarmoqlarda Xonqa tumanida joylashgan korxonalarning biridagi “drobilka” ichiga tushib ketishi oqibatida vafot etgan ayol to‘g‘risida tarqalgan ma’lumotlarga rasmiy munosabat bildirdi.

Aniqlanishicha, Xonqa tumani “Mustaqillik” mahallasida joylashgan Sh.Nurmetov rahbarligidagi “Qoraqosh ta’mir plast servis” xususiy korxonasiga yollanma ishchi sifatida jalb qilingan S.M. ismli ayol 2021-yil 8-iyul kuni soat 09:15 larda ish jarayonida korxonaning plastik mahsulotlarni maydalash bo‘limidagi “drobilka”da ishlayotgan vaqtida ushbu stanokning ichiga tushib ketgan.

Ta’kidlanishicha, ushbu stanok texnika xavfsizligi talabiga javob bermaydigan qo‘lbola usulda yasalgan bo‘lib, u plastik mahsulotlarni maydalashga mo‘ljallangan. Ayol chap yelka sohasi yuqori uchligidan va chanoq-son bo‘g‘imidan chap oyog‘i jarohatdan keyingi to‘liq amputatsiyasi bilan bog‘liq tan jarohatlari olishi oqibatida vafot etgan.

Mazkur holat yuzasidan 8-iyul kuni Xonqa tumani IIB huzuridagi Tergov bo‘limi tomonidan Jinoyat kodeksining 257-moddasi (mehnatni muhofaza qilish qoidalarini buzish) 2-qismi “a” bandi bilan jinoyat ishi qo‘zg‘atilib, korxonada mehnatni muhofaza qilish qoidalariga rioya qilinishi bo‘yicha viloyat bandlik bosh boshqarmasi tomonidan tekshirish o‘tkazilgan.

Tekshirishda fuqaro M.S.ning vafot etishiga “Qoraqosh ta’mir plast servis” xususiy korxonasida xodimlarning xavfsizlik texnikasi talab va qoidalariga rioya qilishlari ustidan bo‘lgan nazorat sustligi, xodimlarga xavfsiz mehnat usullari o‘rgatilmagani, belgilangan tartibda ishchilar mehnat muhofazasi bo‘yicha o‘qitilmagani aniqlangan. Shuningdek, ma’lum qilinishcha, korxonada ishlar noto‘g‘ri tashkil etilgan va ish joyida xavfsiz mehnat sharoiti yaratilmagan. “Marhuma texnika xavfsizligi qoidalarini bilmasligi, tajribasizligi, o‘zboshimchaligi, shoshma-shosharlik qilib, maydalash va yuvish uskunasi ichiga tushib, plastik chiqindilardan tozalashga uringani aniqlangan”, — deyiladi bayonotda.

Shunga ko‘ra, korxona rahbari Sh.Nurmetov Jinoyat kodeksining 257-moddasi 2-qismi “a” bandida nazarda tutilgan jinoyatni sodir qilganlikda ayblanuvchi tariqasida ishda ishtirok etish uchun jalb qilingan.

Hozirda jinoyat ishi bo‘yicha tergov harakatlari davom etmoqda.