Iqtisodiy tadqiqotlar va islohotlar markazi tahlili O‘zbekistonda iyul oyida aholi o‘rtasida avtomobil oldi-sotdisi sezilarli kamayganini ko‘rsatdi.
Unga ko‘ra, avtomobil oldi-sotdisi bo‘yicha shartnomalar soni iyun oyiga nisbatan 23,8 foizga kamaydi. 2020-yilning iyul oyi bilan taqqoslaganda esa 16,2 foizga o‘sdi.
Markaz mutaxassislarining fikricha, mamlakatda epidemiologik vaziyatning yomonlashuvi sababli joriy etilgan bu yilgi cheklov choralari 2020-yilning iyul oyida butun mamlakat bo‘ylab lokdaun qilinishidan farqli o‘laroq unchalik qattiq bo‘lmadi. Ushbu choralar talabning keskin darajada pasayib ketishining oldini olishga yordam berdi.
Ta’kidlanishicha, hozirda ichki avtomobil bozorida xaridorlar va sotuvchilarga birinchi navbatda narx emas, balki avtomobillarni yetkazib berish bilan bog‘liq qiyinchiliklar bosim ko‘rsatmoqda. Yarimo‘tkazgichlarni yetkazib berish bilan bog‘liq vaziyat yomonlashmoqda va salbiy tendensiya davom etmoqda.
Koronavirus pandemiyasi tufayli vujudga kelgan global mikrochiplarning taqchilligi avtomobillar yetkazib berish kutish vaqtini oshirmoqda. Shu munosabat bilan yangi tuzilgan shartnomalar bo‘yicha ayrim mahalliy avtomobillarni yetkazib berish faqat 2022-yilning fevral oyidan boshlanadi.
Biroq avtomobillar oldi-sotdisining eng katta pasayishi, asosan, ikkilamchi bozorda kuzatildi. Shunday qilib, savdolarning o‘tgan oyga nisbatan kamayishi ikkilamchi bozorda 30,9 foiz, birlamchi bozorda 9,3 foizni tashkil etdi.
Ehtimol, bu yangi avtomobilni yetkazib berish vaqtining oshishi va potensial iste’molchining eski avtomobilini yangisiga almashtirish imkoniyatining cheklanishi bilan bog‘liq bo‘lishi mumkin.
Davlat statistika qo‘mitasi ma’lumotlariga ko‘ra, O‘zbekistonda 2021-yilning dastlabki olti oyida 108 780 dona yengil avtomobil ishlab chiqarilgan bo‘lib, bu 2020-yilning mos davriga nisbatan 34 675 donaga kam. 2021-yilda deyarli barcha modellarni ishlab chiqarish qisqargan.
May oylarida UzAuto Motors yarimo‘tkazgichlar tanqisligi sabab ishlab chiqarish keskin tushib ketgani va oqibatda yetkazib berish muddatlari ham uzayganini ma’lum qilgandi.
Izoh (0)