Иқтисодий тадқиқотлар ва ислоҳотлар маркази таҳлили Ўзбекистонда июль ойида аҳоли ўртасида автомобиль олди-сотдиси сезиларли камайганини кўрсатди.
Унга кўра, автомобиль олди-сотдиси бўйича шартномалар сони июнь ойига нисбатан 23,8 фоизга камайди. 2020 йилнинг июль ойи билан таққослаганда эса 16,2 фоизга ўсди.
Марказ мутахассисларининг фикрича, мамлакатда эпидемиологик вазиятнинг ёмонлашуви сабабли жорий этилган бу йилги чеклов чоралари 2020 йилнинг июль ойида бутун мамлакат бўйлаб локдаун қилинишидан фарқли ўлароқ унчалик қаттиқ бўлмади. Ушбу чоралар талабнинг кескин даражада пасайиб кетишининг олдини олишга ёрдам берди.
Таъкидланишича, ҳозирда ички автомобиль бозорида харидорлар ва сотувчиларга биринчи навбатда нарх эмас, балки автомобилларни етказиб бериш билан боғлиқ қийинчиликлар босим кўрсатмоқда. Яримўтказгичларни етказиб бериш билан боғлиқ вазият ёмонлашмоқда ва салбий тенденция давом этмоқда.
Коронавирус пандемияси туфайли вужудга келган глобал микрочипларнинг тақчиллиги автомобиллар етказиб бериш кутиш вақтини оширмоқда. Шу муносабат билан янги тузилган шартномалар бўйича айрим маҳаллий автомобилларни етказиб бериш фақат 2022 йилнинг февраль ойидан бошланади.
Бироқ автомобиллар олди-сотдисининг энг катта пасайиши, асосан, иккиламчи бозорда кузатилди. Шундай қилиб, савдоларнинг ўтган ойга нисбатан камайиши иккиламчи бозорда 30,9 фоиз, бирламчи бозорда 9,3 фоизни ташкил этди.
Эҳтимол, бу янги автомобилни етказиб бериш вақтининг ошиши ва потенциал истеъмолчининг эски автомобилини янгисига алмаштириш имкониятининг чекланиши билан боғлиқ бўлиши мумкин.
Давлат статистика қўмитаси маълумотларига кўра, Ўзбекистонда 2021 йилнинг дастлабки олти ойида 108 780 дона енгил автомобиль ишлаб чиқарилган бўлиб, бу 2020 йилнинг мос даврига нисбатан 34 675 донага кам. 2021 йилда деярли барча моделларни ишлаб чиқариш қисқарган.
Май ойларида UzAuto Motors яримўтказгичлар танқислиги сабаб ишлаб чиқариш кескин тушиб кетгани ва оқибатда етказиб бериш муддатлари ҳам узайганини маълум қилганди.
Изоҳ (0)