Namanganda Mustaqillik bayrami arafasida to‘rtta tibbiy muassasa mukammal ta’mirlanib, foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.
Respublika shoshilinch tibbiy yordam ilmiy markazining Namangan filiali bundan 22 yil avval viloyat ko‘p tarmoqli shifoxonasi negizida tashkil etilgan edi. Vaqtlar o‘tib, bu yerdagi bino va inshootlar, jihoz va qurilmalar eskirdi.
Filialni bugungi kun talablari asosida rekonstruksiya qilish va qayta qurishga 46 milliard so‘m sarflandi. 350 o‘rinli davolash bo‘limlari ta’mirdan chiqarildi, muhandislik tarmoqlari yangilandi. Davolanuvchilar va tibbiyot xodimlari uchun qulay, shinam sharoitlar yaratildi.
Aholiga ko‘rsatilayotgan tibbiy xizmat sifatini oshirish uchun malakali kadrlar va zamonaviy tibbiy asbob-uskunalar talab etiladi. Respublika shoshilinch tibbiy yordam ilmiy markazi direktori, tibbiyot fanlari doktori Baxtiyor To‘laganovga ko‘ra, Namangan filialiga yaqin orada 3,8 million dollarlik yangi asbob-uskuna va tibbiyot apparaturalari yetkazib beriladi.
Respublika shoshilinch tibbiy yordam ilmiy markazining Namangan filialiga qo‘shni joylashgan 300 o‘rinli shahar bolalar shifoxonasi binosi ham ta’mirtalab bo‘lib qolgan, bu yerdagi qoniqarsiz shart-sharoitlar tufayli e’tirozlar ko‘p edi.
Quruvchilar mehnati tufayli tibbiyot maskani ko‘rkam qiyofaga kirdi. Binolarga jaziramada salqin, qahraton payti iliq tutuvchi qoplamalar o‘rnatildi. Reanimatsiya va operatsiya xonalarida uzluksiz mo‘tadil harorat yaratildi, “toza hudud” vujudga keltirildi. Buning uchun davlat budjetidan 34 milliard so‘m ajratildi.
Tibbiy tekshiruv va muolaja apparatlari yangilandi. Shifoxonani eng zamonaviy tibbiy texnika vositalari bilan jihozlash maqsadida 1,5 milliard so‘mlik asbob-uskunalar keltirildi.
Investitsiya dasturiga muvofiq, Namangan shahar tug‘ruq majmuasi ham qayta ta’mirlandi va rekonstruksiya qilindi.
Shuningdek, qo‘shimcha binolar barpo etildi. Bu maqsadlar uchun 28 milliard so‘m mablag‘ yo‘naltirildi.
Shaharning Yangi Namangan tumanida esa 2-tug‘ruq majmuasi foydalanishga topshirildi. Sobiq travmatologiya shifoxonasi o‘rnida shinam va zamonaviy tug‘ruq kompleksi qad rostladi.
Inshoot nafaqat ta’mirlandi, balki yonida qo‘shimcha 5 qavatli bino ham qurildi. Isitish va sovutish tarmoqlari bugungi texnologiyalar asosida takomillashtirildi.
Bu ishlar uchun 15 milliard so‘m sarflandi. Muassasani eng zamonaviy tibbiyot asbob-uskunalari bilan jihozlash uchun yana 4 milliard so‘m ajratilishi ko‘zda tutilgan.
Tibbiyot muassasalarini foydalanishga topshirish marosimlarida viloyat hokimi Shavkat Abdurazzoqov ishtirok etdi.
Ma’lumot uchun, Namanganda investitsiya dasturiga asosan 2021-yil 8 ta davolash-profilaktika muassasasida 70 milliard so‘mlik yangi qurilish, rekonstruksiya va mukammal ta’mirlash ishlarini amalga oshirish ko‘zda tutilgan.
Shuningdek, “Obod qishloq” va “Obod mahalla” dasturlari doirasida ham o‘nlab tibbiyot muassasalari binolari ta’mirdan chiqarilmoqda.
Izoh (0)