O‘zbekistonda 21-avgust kuni umumxalq xayriya hashari o‘tkaziladi, deb xabar bermoqda Mahalla va oilani qo‘llab-quvvatlash vazirligi matbuot xizmati Vazirlar Mahkamasining tegishli farmoyishiga tayanib.
“Yangi O‘zbekistonda erkin va farovon yashaylik” shiori ostida o‘tkazilishi rejalashtirilayotgan ushbu tashabbus doirasida:
- mahallalar;
- aholi yashash xonadonlari;
- ko‘p qavatli uy atroflari;
- guzar va xiyobonlar;
- ziyoratgoh va qabristonlar;
- ko‘cha va bolalar maydonchalarida keng obodonlashtirish va ko‘kalamzorlashtirish ishlari olib boriladi.
Ushbu farmoyish bilan 2021-yilning avgust oyi “Mahallalarni obodonlashtirish” oyligi etib ham belgilandi.
O‘zbekistonda umumxalq xayriya hashari so‘nggi marta 13-mart kuni o‘tkazilgandi. Unda 8,3 million kishi qatnashgani ma’lum qilindi. Bu so‘nggi yillarda aytilgan eng kichik raqam.
Eslatib o‘tamiz, 2018-yildan buyon avtomobil yo‘llari, harakatlanish tig‘iz bo‘lgan ko‘chalar, suv obyektlari, qirg‘oqbo‘yi hududlar va zonalar, qurilish maydonlari, bino va inshootlar tomlari, xavfli ishlab chiqarish obyektlari, shuningdek, insonlarning hayoti yoki sog‘lig‘iga xavf yuzaga kelishi mumkin bo‘lgan boshqa joylarda ixtiyoriy tashabbus bilan hasharlar va boshqa ishlarni o‘tkazish taqiqlangan.
Ushbu targ‘ibot-tashviqot tadbirlarida joylarda ish beruvchilar tomonidan hasharda ko‘zda tutilgan ishlar uchun ishchilarni majburiy tarzda jalb etishga mutlaqo yo‘l qo‘ymaydi, shunday holatlarga yo‘l qo‘ygan mutasaddilarga jazo choralari qo‘llaniladi.
Izoh (0)