Ўзбекистонда 21 август куни умумхалқ хайрия ҳашари ўтказилади, деб хабар бермоқда Маҳалла ва оилани қўллаб-қувватлаш вазирлиги матбуот хизмати Вазирлар Маҳкамасининг тегишли фармойишига таяниб.
«Янги Ўзбекистонда эркин ва фаровон яшайлик» шиори остида ўтказилиши режалаштирилаётган ушбу ташаббус доирасида:
- маҳаллалар;
- аҳоли яшаш хонадонлари;
- кўп қаватли уй атрофлари;
- гузар ва хиёбонлар;
- зиёратгоҳ ва қабристонлар;
- кўча ва болалар майдончаларида кенг ободонлаштириш ва кўкаламзорлаштириш ишлари олиб борилади.
Ушбу фармойиш билан 2021 йилнинг август ойи «Маҳаллаларни ободонлаштириш» ойлиги этиб ҳам белгиланди.
Ўзбекистонда умумхалқ хайрия ҳашари сўнгги марта 13 март куни ўтказилганди. Унда 8,3 миллион киши қатнашгани маълум қилинди. Бу сўнгги йилларда айтилган энг кичик рақам.
Эслатиб ўтамиз, 2018 йилдан буён автомобиль йўллари, ҳаракатланиш тиғиз бўлган кўчалар, сув объектлари, қирғоқбўйи ҳудудлар ва зоналар, қурилиш майдонлари, бино ва иншоотлар томлари, хавфли ишлаб чиқариш объектлари, шунингдек, инсонларнинг ҳаёти ёки соғлиғига хавф юзага келиши мумкин бўлган бошқа жойларда ихтиёрий ташаббус билан ҳашарлар ва бошқа ишларни ўтказиш тақиқланган.
Ушбу тарғибот-ташвиқот тадбирларида жойларда иш берувчилар томонидан ҳашарда кўзда тутилган ишлар учун ишчиларни мажбурий тарзда жалб этишга мутлақо йўл қўймайди, шундай ҳолатларга йўл қўйган мутасаддиларга жазо чоралари қўлланилади.
Изоҳ (0)