“Tolibon” Kobuldagi Rossiya elchixonasini qo‘riqlashni boshladi

Kobulda ayni paytda faqat Rossiya va Xitoy elchixonalari ishlamoqda. Bu haqda Rossiyaning Afg‘onistondagi elchisi Dmitriy Jirnov ma’lum qildi. Uning so‘zlariga ko‘ra, “tartibsizlik” sezilib tursa-da, shaharda vaziyat tinch.

Rossiya diplomatik xodimlari haqida gap borar ekan, Jirnovning so‘zlariga ko‘ra, “ularning boshidan bir tola soch ham to‘kilmaydi”. “Rossiya elchixonasini ‘Tolibon’ qo‘riqlaydi”, — dedi u “Rossiya 24” telekanali efirida.

“Bizni qo‘riqlayotgan Afg‘oniston milliy xavfsizlik kuchlarining harbiylari ketdi. Hozir ‘Tolibon’ qolgan. Ular yana bir bor tasdiqladiki, rossiyalik diplomatlar boshidan bir tola soch ham to‘kilmaydi”, — dedi elchi.

U mamlakatdagi vaziyatni umumiy baholab, shunday dedi: “Haqiqatan ham, hukumat quladi, u kartalardan qurilgan uyga o‘xshardi. Hukumatdagi bu bo‘shliq, bu anarxiya shaharda tartibsizlik keltirib chiqardi. Qurolli qaroqchilar paydo bo‘ldi. Ammo bu yerda bir narsani tushunish kerak: Afg‘onistonda har doim hamma qurollangan”.

Jirnovning so‘zlariga ko‘ra, “toliblar shaharga joylasha boshlagan, lekin ular yaxshi tarzda joylashmoqda”. Ular jamoat tartibini tiklamoqda: 16-avgustga o‘tar kechasi talonchilarga qarshi kurashish uchun komendantlik soati joriy etildi.

“Bugun ertalab hech qanday o‘q otilmadi”, — dedi diplomat. Uning so‘zlariga ko‘ra, shaharda maktablar, shu jumladan, qizlar maktabi ham ishlashda davom etmoqda.

Jirnov Rossiya kelajakda “Tolibon” bilan qanday muloqot o‘rnatishi haqida shunday fikr bildirdi: “O‘ylashimcha, biz ularning haqiqiy yo‘nalishini kuzatamiz. Biz Afg‘oniston madaniyatli bo‘lishini, unda terrorizm, giyohvand moddalar bo‘lmasligini, inson huquqlari hurmat qilinishini istaymiz. ‘Tolibon’ bizga barcha tegishli va’dalarni berdi, umid qilamizki, ular amalga oshadi. Yo‘limizni shunga qarab quramiz, deb o‘ylayman. Kutish kerak”.

Bu orada Rossiya Tashqi ishlar vazirligining Ikkinchi Osiyo departamenti direktori Zamir Kabulov baribir Rossiya diplomatik xodimlarining bir qismi Kobuldan evakuatsiya qilinishini aytdi. Afg‘oniston poytaxtida Rossiyaning hammasi bo‘lib yuzga yaqin diplomati bor.