Majburiy ijro byurosi Toshkent viloyati Bo‘stonliq tumanida joylashgan turar joy binosini auksionga qo‘ydi, deb xabar beradi Spot.
Lot izohida yozilishicha, 1998-yilda qurilgan ikki qavatli bino 35 ta xonadan iborat. Uy joylashgan maydonning umumiy kattaligi 0,68 gektarni tashkil etadi. Binoning o‘zi 849,25 kvadrat metr joyni egallagan. Foydali maydon — 513,5 kvadrat metr.
Mazkur dala hovli viloyat Iqtisodiyot sudining 2020-yil 14-iyundagi qaroriga ko‘ra sotuvga qo‘yilgan. Xonadonda gaz, elektr, suv ta’minoti va kanalizatsiya mavjud.
Uyning boshlang‘ich narxi — 7,7 milliard so‘m. Arizalar 24-avgustga qadar qabul qilinadi, savdolar 26-avgust kuni bo‘lib o‘tadi.
Eslatib o‘tamiz, bundan avval MIB Toshkentdagi yarmarkada yarim milliard so‘mdan ko‘proq mahsulotni sotuvga qo‘ygani hamda Toshkentdagi 5 qavatli savdo markazini auksionga qo‘ygani to‘g‘risida xabar berilgandi.
Izoh (0)