Afg‘oniston va Pokiston o‘rtasidagi eng gavjum chegaradan o‘tish yo‘li — Torkxam 15-avgust, yakshanba kuni ertalab “Tolibon” harakati jangarilari tomonidan egallab olindi. Bundan tashqari, Vardak viloyatining ma’muriy markazi — Maydonshahr shahri ham ularning qo‘l ostiga o‘tdi. Bu haqda harakat matbuot kotibi Zabixulla Mujohid ma’lum qildi.
“Nangarhor viloyatidagi Lal Pur uyezdida Pokiston bilan chegarada joylashgan Torkxam mujohidlar qo‘liga o‘tdi. Komissarlik va shahardagi boshqa obyektlar ham mujohidlar nazorati ostiga o‘tdi. Mujohidlar komissiyalar, chegara o‘tish yo‘li faoliyati, shuningdek, odamlarning ishlari va ularning bizneslari iloji boricha tezroq qayta tiklanishi uchun harakat qilmoqda”, — dedi “Tolibon” vakili.
Afg‘onistonning Nangarhor viloyatini Pokistonning Xayber-Paxtunxva viloyati bilan bog‘lovchi Torkxam chegaradan o‘tish yo‘li mamlakatlararo yuklar olib o‘tiladigan asosiy joy bo‘lib xizmat qiladi.
Shuningdek, Vardak viloyati ma’muriy markazi Maydonshahr ham “Tolibon” nazorati ostiga o‘tgani haqida Zabixulla Mujohid o‘z Twitter’ida ma’lum qildi.
Uning xabariga ko‘ra, gubernator, politsiya boshlig‘i va boshqa boshqaruv organlari vakillar tomonidan egallab olingan. Hukumat kuchlarining qurol-yarog‘lari va aslahalari “Tolibon” qo‘liga o‘tgan.
Maydonshahr Kobuldan janubi-g‘arbda, undan 45,7 kilometr uzoqlikda joylashgan.
Avvalroq “Tolibon” vakili Nangarhor viloyati poytaxti Jalolobod va Daykundi viloyati ma’muriy markazi Nili shaharlari harakat tomonidan egallab olinganini ma’lum qilgandi.
Undan avval, shanba (14-avgust) kuni kechqurun to‘qqizta viloyat markazlari kun davomida ularning nazorati ostiga o‘tgani aytilgandi.
Afg‘oniston sharqida endi faqat poytaxt Kobulgina hukumat kuchlari nazorati ostida qolmoqda. Avvalroq “Tolibon”ning old otryadlari Kobuldan 11 kilometr masofada aniqlangani xabar berilgandi.
Avvalroq 84 nafar afg‘on harbiy xizmatchisi O‘zbekiston tomoniga o‘tib, yordam so‘ragani xabar berilgandi.
Afg‘onistondagi o‘zbeklar yetakchisi sifatida ko‘riladigan marshal Abdurashid Do‘stum va mamlakatdagi tojik millatiga mansub aholi yetakchisi, Balx viloyatining sobiq gubernatori Ato Muhammad Nur hozirgi vaqtda “xavfsiz joyda” bo‘lib turgani ma’lum qilingan, ayrim manbalarga ko‘ra, ular vertolyotda O‘zbekistonga uchib ketgan bo‘lishi mumkin.
Izoh (0)