Афғонистон ва Покистон ўртасидаги энг гавжум чегарадан ўтиш йўли — Торкхам 15 август, якшанба куни эрталаб «Толибон» ҳаракати жангарилари томонидан эгаллаб олинди. Бундан ташқари, Вардак вилоятининг маъмурий маркази — Майдоншаҳр шаҳри ҳам уларнинг қўл остига ўтди. Бу ҳақда ҳаракат матбуот котиби Забихулла Мужоҳид маълум қилди.
«Нангарҳор вилоятидаги Лал Пур уездида Покистон билан чегарада жойлашган Торкхам мужоҳидлар қўлига ўтди. Комиссарлик ва шаҳардаги бошқа объектлар ҳам мужоҳидлар назорати остига ўтди. Мужоҳидлар комиссиялар, чегара ўтиш йўли фаолияти, шунингдек, одамларнинг ишлари ва уларнинг бизнеслари иложи борича тезроқ қайта тикланиши учун ҳаракат қилмоқда», — деди «Толибон» вакили.
Афғонистоннинг Нангарҳор вилоятини Покистоннинг Хайбер-Пахтунхва вилояти билан боғловчи Торкхам чегарадан ўтиш йўли мамлакатлараро юклар олиб ўтиладиган асосий жой бўлиб хизмат қилади.
Шунингдек, Вардак вилояти маъмурий маркази Майдоншаҳр ҳам «Толибон» назорати остига ўтгани ҳақида Забихулла Мужоҳид ўз Twitter’ида маълум қилди.
Унинг хабарига кўра, губернатор, полиция бошлиғи ва бошқа бошқарув органлари вакиллар томонидан эгаллаб олинган. Ҳукумат кучларининг қурол-яроғлари ва аслаҳалари «Толибон» қўлига ўтган.
Майдоншаҳр Кобулдан жануби-ғарбда, ундан 45,7 километр узоқликда жойлашган.
Аввалроқ «Толибон» вакили Нангарҳор вилояти пойтахти Жалолобод ва Дайкунди вилояти маъмурий маркази Нили шаҳарлари ҳаракат томонидан эгаллаб олинганини маълум қилганди.
Ундан аввал, шанба (14 август) куни кечқурун тўққизта вилоят марказлари кун давомида уларнинг назорати остига ўтгани айтилганди.
Афғонистон шарқида энди фақат пойтахт Кобулгина ҳукумат кучлари назорати остида қолмоқда. Аввалроқ «Толибон»нинг олд отрядлари Кобулдан 11 километр масофада аниқлангани хабар берилганди.
Аввалроқ 84 нафар афғон ҳарбий хизматчиси Ўзбекистон томонига ўтиб, ёрдам сўрагани хабар берилганди.
Афғонистондаги ўзбеклар етакчиси сифатида кўриладиган маршал Абдурашид Дўстум ва мамлакатдаги тожик миллатига мансуб аҳоли етакчиси, Балх вилоятининг собиқ губернатори Ато Муҳаммад Нур ҳозирги вақтда «хавфсиз жойда» бўлиб тургани маълум қилинган, айрим манбаларга кўра, улар вертолётда Ўзбекистонга учиб кетган бўлиши мумкин.
Изоҳ (0)