“Tolibon” harakati 14-avgust kuni Afg‘onistondagi to‘qqizta viloyat ma’muriy markazlarini egallab olganini ma’lum qildi. Bu haqda “Interfaks” xabar berdi.
“Paktika, Paktiya, Kunar, Forob, Balx va Lagman ‘Tolibon’ ixtiyoriga o‘tgan. Shaharlarni egallash vaqtida minglab askarlar, politsiya va boshqa harbiy kuchlar o‘z qurolini topshirgan va ‘Tolibon’ harakati mujohidlari tomoniga o‘tgan”, — deyiladi harakatning rasmiy bayonotida.
Shuningdek, bayonotda qayd etilishicha, egallangan viloyatlar hududidagi minglab yengil va og‘ir qurollar, millionlab o‘q-dorilar, harbiylar va noharbiy transport vositalari, uskunalar harakat vakillarining ixtiyoriga o‘tgan.
Balx viloyati sobiq gubernatori, Islom jamiyati (Afg‘onistondagi tojik va fors tilida muloqot qiluvchi aholining birlashmasi) partiyasi yetakchilaridan biri Ato Muhammad Nur hududning “Tolibon” tomonidan egallanishiga fitna sabab bo‘lganini ma’lum qilgan.
“Fitna oqibatida barcha hukumat obyektlari va kuchlar ‘Tolibon’ ixtiyoriga o‘tdi. Ushbu fitnaning asoratlari chuqur va og‘ir bo‘ladi, ular marshal Abdulla Rashid hamda meni tuzoqqa tushirmoqchi bo‘lishdi”, — deb yozgan viloyat rahbari Facebook’da.
“Kurash shu bilan tugamaydi”, — deya qo‘shimcha qilgan Muhammad Nur. Gubernator “Tolibon”ga qarshi mardonavor kurashgan Balx shahri aholisiga minnatdorlik bildirgan.
Afg‘oniston hududining, taxminan, uchdan ikki qismi “Tolibon” ixtiyoriga o‘tgan.
“Tolibon” a’zolari 14-avgustda Kobul janubidagi Logar viloyatida faol jang qilgan. “Tolibon” yetakchi kuchlari mamlakat poytaxtidan 11 kilometr uzoqlikda yurgani haqida xabarlar tarqalgan. Ayni vaqtda “Tolibon”ning poytaxtni egallashga jiddiy kuch sarflayotgani, kuchli bosim bilan Kobul tomon yurish qilayotgani haqida axborotlar ko‘zga tashlanmagan.
G‘arb OAVda jangarilarning asta-sekin Kobulni o‘rab olayotgani haqida xabarlar berilgan. BBC’ning qayd etishicha, shaharda xalqaro aeroportdagi yuklama ortib ketgan, xorijliklar, chet elda siyosiy boshpana olish huquqiga ega bo‘lgan afg‘onistonliklar mamlakatdan chiqib ketishga urinmoqda.
14-avgustda Afg‘oniston prezidenti Ashraf G‘ani kutilayotgan beqarorlikni bartaraf qilishni va’da bergan va bu uchun qurolli kuchlarni isloh etish lozimligi haqida xalqqa murojaat yo‘llagandi. Prezident “Tolibon” Afg‘onistonni egallab olayotgan bir pallada mamlakatdagi mavjud chigal vaziyat bo‘yicha xalqaro hamkorlar bilan maslahatlashuvlar o‘tkazilayotganini bildirgan.
Xorij davlatlarining, jumladan AQSh, Kanada va Buyuk Britaniya qo‘shinlari o‘z vatandoshlarini Kobuldan uyga evakuatsiya qilish yuzasidan maxsxus operatsiyalar amalga oshirishni boshlagan.
Shanba kuni “Tolibon” vakillari Afg‘onistodagi beshinchi eng katta shahar — Jalolobodni ham egallagan.
Nangarxor viloyati deputati Abrorullo Murod shaharning “Tolibon” ixtiyoriga jangsiz topshirilgani va bu boradagi qaror hudud oqsoqollari tomonidan chiqarilganligini aytgan. “Tolibon” ham shaharning mujohidlar nazoratiga o‘tganligini rasman tasdiqlagan.
“Jihod al-Fatx operatsiyasi davomida Nangarxor viloyatining markazi — Jalolobod shahri to‘liq egallandi. Gubernator qarorgohi, razvedka boshqarmasi, politsiya idorasi va boshqa obyektlar mujohidlarning nazorati ostiga olindi”, — degan “Tolibon” rasmiy vakili Kari Ahmadiy.
Uning so‘zlariga ko‘ra, yakshanba tongida Daykundi viloyatining markazi Nili shahri ham “Tolibon” tomonidan egallangan. Afg‘oniston hukumati bu ma’lumotni rasman tasdiqlamadi.
Kobul va Jalolobod Afg‘oniston sharqida “Tolibon” ixtiyoriga o‘tmagan, hukumat boshqaruvidagi ikki katta shahar bo‘lib turgandi.
AQSh, NATO va Yevropaning boshqa davlatlari Afg‘oniston hududidan o‘z qo‘shinlarini olib chiqib keta boshlagach, mamlakatda “Tolibon” jangarilari faollashdi va 34 ta viloyatdan 20 tasini egallashga muvaffaq bo‘ldi.
AQSh hamda uning ittifoqchilari harbiylarni olib chiqib ketishni avgust oxirigacha yakunlashni rejalashtirgandi. Ammo “Tolibon”ning juda tez harakatlangani vaziyatni chigallashtirib yubordi. Ayrim G‘arb davlatlari Afg‘onistondagi fuqarolarini, diplomatlarni va xorijdan boshpana ajratilgan afg‘onistonliklarni qutqarish operatsiyalari uchun Kobulga harbiylarni yubormoqda.
Avval “Tolibon” Mozori-Sharifni egallagani, Afg‘oniston hukumat kuchlari O‘zbekiston tomon qochgani, Termizdagi “Do‘stlik ko‘prigi” afg‘on harbiylari bilan to‘lgani, Mozori-Sharifdan qochgan marshal Do‘stum vertolyotda O‘zbekistonga o‘tgan bo‘lishi mumkinligi, O‘zbekiston 84 nafar afg‘on harbiy xizmatchisini qabul qilgani, ular orasida yaradorlar ham borligi haqida xabarlar berilgandi.
Izoh (0)