Afg‘oniston Ichki ishlar vazirligi “Tolibon” jangarilari Kobulga har tomondan kirib borayotganini ma’lum qildi. Mamlakat prezidenti ma’muriyati esa Kobul hujumga uchramagani va shahardagi vaziyat nazorat ostida ekanini ta’kidlamoqda.
Ayni paytda Qatar poytaxti Dohada bo‘lib turgan “Tolibon” yetakchilari o‘z jangarilarini Kobulni egallash chog‘ida zo‘ravonlikka yo‘l qo‘ymaslikka chaqirdi. Shuningdek, ular Afg‘onistonni tark etmoqchi bo‘lganlarga xavfsiz yo‘laklar qoldirishga va’da bermoqda hamda ayollarni xavfsiz hududlarga yashirinishga chaqirdi.
Poytaxt g‘arbida joylashgan Kobul universiteti “Tolibon” qo‘l ostiga o‘tdi, jangarilar u yerga o‘z bayrog‘ini o‘rnatdi.
Kobul — hukumat kuchlari nazorati ostida qolayotgan so‘nggi shahar edi.
Bundan tashqari, “Tolibon” harakati vakillari ayni paytda Afg‘onistondagi barcha chegara punktlarini nazorat qilmoqda. Shu tariqa, mamlakatni faqat Kobul aeroportidangina tark etish mumkin.
AQShning Afg‘oniston bo‘yicha maxsus vakili Zalmay Halilzod “Tolibon”ni u yerdan Amerika fuqarolari evakuatsiya qilinmagunicha Kobulga kirmaslikka chaqirdi. AP yozishicha, Kobuldagi AQSh elchixonasi yoniga vertolyotlar qo‘nmoqda.
Chexiya va Buyuk Britaniya ham Afg‘onistondagi diplomatik missiyalarini yakunlashga qaror qilgan, ular ham o‘z fuqarolarini evakuatsiya qilmoqda.
Avvalroq “Tolibon” guruhi Afg‘onistonning yirikligi bo‘yicha beshinchi o‘rinda turadigan va Nangarhor viloyati markazi bo‘lgan Jalolobod shahrini o‘z nazorati ostiga olgani xabar berilgan edi. Jalolobod shahri Afg‘oniston sharqida, Pokiston bilan chegara yaqinida joylashgan. U Kobul bilan bir qatorda rasmiy hukumat nazorati ostida bo‘lib turgan so‘nggi yirik shaharlardan biri edi. Shaharning olinishi “Tolibon” uchun poytaxtga, taxminan, 150 kilometrlik to‘g‘ri yo‘l ochib beradi.
Izoh (0)