Turkiya janubida Rossiyadan ijaraga olingan o‘t o‘chirish samolyoti quladi, deya xabar bermoqda Anadolu agentligi. Rossiya Mudofaa vazirligi ma’lumotlariga ko‘ra, bunda gap Turkiyadagi o‘rmon yong‘inlarini o‘chirishga safarbar qilingan Be-200 samolyoti haqida bormoqda. Samolyot Toshkent vaqti bilan soat taxminan 17:10 da Adana shahri yaqinida qulagan.
Ma’lumotlarga ko‘ra, samolyot bortida sakkiz kishi — ekipaj a’zosi hisoblangan besh nafar rossiyalik harbiy xizmatchi hamda ularga yong‘in o‘choqlarini ko‘rsatib turgan uch nafar Turkiya fuqarosi bo‘lgan. Ularning bari halok bo‘lgan. Rossiya prezidenti Vladimir Putin hodisa oqibatida halok bo‘lgan rossiyaliklarni davlat mukofotlariga tavsiya qilish haqida ko‘rsatma bergan.
Turkiya janubida iyul oyidan beri o‘rmon yong‘inlari davom etmoqda. Oy oxirida Rossiya rasmiylari mazkur yong‘inlarni o‘chirishda yordam ko‘rsatish maqsadida Turkiyaga uchta Be-200 samolyotlarini yuborgani ma’lum qilingan edi.
Izoh (0)