Amerika Qo‘shma Shtatlari o‘z fuqarolarini Afg‘onistondan xavfsiz evakuatsiya qilish uchun ushbu mamlakatga 5 mingga yaqin harbiy xizmatchi yuboradi. Bu haqda AQSh prezidenti Jo Baydenning 14-avgust, shanba kuni e’lon qilingan bayonotida so‘z boradi.
“Diplomatik, harbiy va razvedka jamoalarimizning tavsiyalaridan kelib chiqib, men AQSh va boshqa hamkorlarimizning xodimlarini tartibli va xavfsiz olib chiqib ketilishi ta’minlash, shuningdek, missiyamiz davomida bizning qo‘shinlarimizga yordam bergan afg‘onlarni hamda ‘Tolibon’ bosqini oqibatida alohida tahdid ostida qolishi mumkin bo‘lganlarni xavfsiz evakuatsiya qilish uchun 5 mingga yaqirn AQSh harbiy xizmatchilarini joylashtirishga ruxsat berdim”, — deyiladi bayonotda.
Oq uy rahbari AQSh davlat kotibi Entoni Blinkenga Afg‘oniston prezidenti Ashraf G‘ani va afg‘onistonlik boshqa yetakchilarning “kelgusi qon to‘kilishining oldini olish va siyosiy tartibga solishga erishish yo‘lidagi intilishlari”ni qo‘llab-quvvatlash haqida ko‘rsatma bergan.
“Biz ‘Tolibon’ning Dohadagi vakillariga harbiy qo‘mondon orqali ularning Afg‘onistondagi AQSh xodimlari yoki missiyasini xavf ostida qoldiradigan har qanday harakatiga tezkor va kuchli harbiy javob bo‘lishini bildirdik”, — deya ta’kidlagan Jo Bayden.
U o‘z bayonotida qo‘shimcha qilishicha, “toki afg‘on harbiylari mamlakatni ushlab turolmas ekan, AQShning yana bir yil yoki besh yil Afg‘onistonda qolishi vaziyatni o‘zgartirmas edi”. “Amerikaning boshqa mamlakatdagi fuqaroviy nizo markazida cheksiz muddat turib qolishi men uchun nomaqbul hol edi”, — degan Oq uy rahbari.
“Men Amerikaning Afg‘onistondagi harbiy ishtirokiga rahbarlik qilgan to‘rtinchi prezident bo‘ldim... Men bu urushni beshinchi prezident zimmasiga o‘tkazmagan bo‘lardim va o‘tkazmayman ham”, — deya qayd etib o‘tgan Bayden. Uning qo‘shimcha qilishicha, qurolli kuchlar va razvedkaga “kelgusida Afg‘onistondan bo‘ladigan terrorchilik xurujlariga qarshi turish uchun shaylik va hushyorlikni saqlash” haqida buyruq bergan.
Amerika 2021-yil aprel oyidan Afg‘onistondan o‘z qo‘shinlarini olib chiqishni boshlagach, “Tolibon” afg‘on hukumat kuchlariga qarshi urushni kuchaytirdi. So‘nggi bir hafta ichida toliblar mamlakatning aksariyat qismini, xususan, Qandahor va Hirot kabi yirik shaharlari, shuningdek, O‘zbekiston bilan chegara yaqinidagi Mozori-Sharif shahrini qo‘lga kiritdi, deb yozadi “Gazeta.uz”. Hozirgi vaqtda Afg‘oniston armiyasi faqat poytaxt Kobul va uning atrofidagi ayrim hududlarni nazorat qilmoqda, xolos.
Izoh (0)