Афғонистон Ички ишлар вазирлиги «Толибон» жангарилари Кобулга ҳар томондан кириб бораётганини маълум қилди. Мамлакат президенти маъмурияти эса Кобул ҳужумга учрамагани ва шаҳардаги вазият назорат остида эканини таъкидламоқда.
Айни пайтда Қатар пойтахти Доҳада бўлиб турган «Толибон» етакчилари ўз жангариларини Кобулни эгаллаш чоғида зўравонликка йўл қўймасликка чақирди. Шунингдек, улар Афғонистонни тарк этмоқчи бўлганларга хавфсиз йўлаклар қолдиришга ваъда бермоқда ҳамда аёлларни хавфсиз ҳудудларга яширинишга чақирди.
Пойтахт ғарбида жойлашган Кобул университети «Толибон» қўл остига ўтди, жангарилар у ерга ўз байроғини ўрнатди.
Кобул — ҳукумат кучлари назорати остида қолаётган сўнгги шаҳар эди.
Бундан ташқари, «Толибон» ҳаракати вакиллари айни пайтда Афғонистондаги барча чегара пунктларини назорат қилмоқда. Шу тариқа, мамлакатни фақат Кобул аэропортидангина тарк этиш мумкин.
АҚШнинг Афғонистон бўйича махсус вакили Залмай Ҳалилзод «Толибон»ни у ердан Америка фуқаролари эвакуация қилинмагунича Кобулга кирмасликка чақирди. АP ёзишича, Кобулдаги АҚШ элчихонаси ёнига вертолётлар қўнмоқда.
Чехия ва Буюк Британия ҳам Афғонистондаги дипломатик миссияларини якунлашга қарор қилган, улар ҳам ўз фуқароларини эвакуация қилмоқда.
Аввалроқ «Толибон» гуруҳи Афғонистоннинг йириклиги бўйича бешинчи ўринда турадиган ва Нангарҳор вилояти маркази бўлган Жалолобод шаҳрини ўз назорати остига олгани хабар берилган эди. Жалолобод шаҳри Афғонистон шарқида, Покистон билан чегара яқинида жойлашган. У Кобул билан бир қаторда расмий ҳукумат назорати остида бўлиб турган сўнгги йирик шаҳарлардан бири эди. Шаҳарнинг олиниши «Толибон» учун пойтахтга, тахминан, 150 километрлик тўғри йўл очиб беради.
Изоҳ (0)