Sirdaryo viloyatida 7 ta tuman-shahar hokimiga, bitta tashkilot va bitta boshqarma boshliqlariga nisbatan hayfsan intizomiy jazo chorasini qo‘llanildi, deb xabar beradi “Xalq so‘zi online”.
Ma’lum qilinishicha, Sirdaryo viloyati hokimi G‘ofurjon Mirzayevning 12-avgustda imzolagan qaroriga ko‘ra, Guliston shahar hokimi To‘lqin Dadaboyev, Yangiyer shahar hokimi Elyor Xo‘jayev, Sardoba tumani hokimi Abduazim Xidirov, Mirzaobod tumani hokimi Jonibek Yariyev, Sirdaryo tumani hokimi Botir Mirzaqulov, Sayhunobod tumani hokimi Farruh O‘ktamjonov, Oqoltin tumani hokimi Dilmurod Fozilovga hayfsan berilgan.
Shuningdek, Sirdaryo viloyati hokimligining qurilish bo‘yicha “Yagona buyurtmachi xizmati” IK rahbari Sh. Abdullayev, Sirdaryo viloyati xalq ta’lim boshqarmasi boshlig‘i O.Donaboyevga ham hayfsan intizomiy jazo chorasi qo‘llanilgan.
Ta’kidlanishicha, mazkur intizomiy choralar O‘zbekiston Prezidentining Virtual va xalq qabulxonalari orqali, idoralar, davlat ishtirokidagi tashkilotlar va mahalliy ijro etuvchi hokimiyati organlarida jismoniy va yuridik shaxslarning murojaatlarini ko‘rib chiqishni bajarishda sustkashlikka yo‘l qo‘ygani uchun berilgan.
Avvalroq Guliston tumanida “to‘rtlik” almashgani, Tovar-xomashyo birjasi Sirdaryo viloyati filiali direktori Guliston hokimi etib tayinlangani to‘g‘risida xabar berilgandi.
Izoh (0)