Bring a Trailer auksioni orqali 1986-yilda ishlab chiqarilgan qora Porsche 911 Carrera avtomobili sotuvga qo‘yiladi. Ushbu sportkarga birinchi bo‘lib amerikalik mashhur aktyor Tom Kruz egalik qilgan. Yillar davomida to‘liq qayta tiklash jarayonidan o‘tgan avtomobil hozirda 51,5 ming dollarga baholanmoqda. Savdolar yakunlanishiga to‘rt kun qoldi, deb xabar beradi Motor.
Amerikalik kinoaktyor sportkardan bir yildan kamroq vaqt davomida foydalangan. 1987-yilning fevralida Tom Kruz o‘zining Porsche 911 Carrera’sini sotib yuborgan. Shundan so‘ng avtomobil bir necha bor o‘z egasini almashtirib, 2020-yilda restavratsiyaga yo‘l olgan. Ko‘plab ta’mirlash ishlaridan so‘ng, sportkarning kuzovidagi lak-bo‘yoq, charm saloni qayta tiklangan, “podveska”si almashgan, dvigateli va transmissiyasi ta’mirlangan, shuningdek, akkumulyatori yangilangan.
Porsche 911 Carrera iqlim sozlamasiga, kruiz-nazorat, shuningdek, zamonaviy stereotizimga ega. Sportkarga Continental shinalariga ega 16 dyuymli Fuchs g‘ildirak diskalari kiygizilgan. Mashina 230 ot kuchini taqdim etishga qodir olti silindrga ega 3,2 litrli dvigatel yordamida harakatga keladi. Agregat besh pog‘onali mexanik uzatmalar qutisi yordamida boshqariladi.
Odometrga ko‘ra, sportkar 14 ming kilometr yo‘l bosgan. Ammo avtomobilning hozirgi egasi mashinani qayta tiklash jarayonida qurilmani almashtirgan, shu sababli Porsche’ning real bosib o‘tgan masofasi noma’lum. Ayni vaqtda noyob 911 Carrera 51,5 ming dollarga baholanmoqda.
Avvalroq Kaliforniyada Tom Xenksga tegishli g‘ildiraklar ustidagi uy auksionga qo‘yilishi, Gollivud aktyori Silvestr Stallone o‘zining shaxsiy Cadillac Escalade yo‘ltanlamasini 350 ming dollar evaziga sotuvga qo‘ygani to‘g‘risida xabar berilgandi.
Izoh (0)