Том Крузга тегишли бўлган 35 йиллик Porsche аукционга қўйилди (фото)

Bring a Trailer аукциони орқали 1986 йилда ишлаб чиқарилган қора Porsche 911 Carrera автомобили сотувга қўйилади. Ушбу спорткарга биринчи бўлиб америкалик машҳур актёр Том Круз эгалик қилган. Йиллар давомида тўлиқ қайта тиклаш жараёнидан ўтган автомобиль ҳозирда 51,5 минг долларга баҳоланмоқда. Савдолар якунланишига тўрт кун қолди, деб хабар беради Motor.

Америкалик киноактёр спорткардан бир йилдан камроқ вақт давомида фойдаланган. 1987 йилнинг февралида Том Круз ўзининг Porsche 911 Carrera’сини сотиб юборган. Шундан сўнг автомобиль бир неча бор ўз эгасини алмаштириб, 2020 йилда реставрацияга йўл олган. Кўплаб таъмирлаш ишларидан сўнг, спорткарнинг кузовидаги лак-бўёқ, чарм салони қайта тикланган, «подвеска»си алмашган, двигатели ва трансмиссияси таъмирланган, шунингдек, аккумулятори янгиланган.

Porsche 911 Carrera иқлим созламасига, круиз-назорат, шунингдек, замонавий стереотизимга эга. Спорткарга Continental шиналарига эга 16 дюймли Fuchs ғилдирак дискалари кийгизилган. Машина 230 от кучини тақдим этишга қодир олти цилиндрга эга 3,2 литрли двигатель ёрдамида ҳаракатга келади. Агрегат беш поғонали механик узатмалар қутиси ёрдамида бошқарилади.

Одометрга кўра, спорткар 14 минг километр йўл босган. Аммо автомобилнинг ҳозирги эгаси машинани қайта тиклаш жараёнида қурилмани алмаштирган, шу сабабли Porsche’нинг реал босиб ўтган масофаси номаълум. Айни вақтда ноёб 911 Carrera 51,5 минг долларга баҳоланмоқда.

Аввалроқ Калифорнияда Том Хенксга тегишли ғилдираклар устидаги уй аукционга қўйилиши, Голливуд актёри Силвестр Сталлоне ўзининг шахсий Cadillac Escalade йўлтанламасини 350 минг доллар эвазига сотувга қўйгани тўғрисида хабар берилганди.