Қашқадарёда ҳоким Зоир Мирзаев қабулида бўлган фуқаро учун сарфланажак харажатлар шикоятчи фуқаро яшовчи туман ҳокимлари томонидан қопланиши йўлга қўйилади. Бу ҳақда вилоят ҳокимлиги ахборот хизмати маълум қилди.
Ҳокимлик ахборот хизмати раҳбари Аҳрор Содиқовнинг «Дарё»га аниқлик киритишича, ҳоким бу ҳақда Халқ депутатлари вилоят кенгашининг навбатдаги сессиясида сўз юритган.
«Эндиликда қабулга келган фуқаролар учун стол-стул қиламиз-да, чой ва кофе дамлайдиган аппарат қўйиб, фуқароларга хизмат кўрсатамиз. Қабулга келган фуқаро салқин хонада, чой, кофе ичиб, шоколад еб ўтиради. Ой якунида эса ҳар бир туман ва шаҳар ҳокимларига хат юбориб, ‘бу ой туманингиздан қабулга шунча фуқаро келди ва шу фуқаролар учун шунча харажат қилинди, деб сарф-харажатни кўрсатамиз. Ҳамда пулини ҳокимдан оламиз», — дейди вилоят ҳокими Зоир Мирзаев.
Зоир Мирзаевнинг айтишича, вилоятда фуқароларни қабул қилишда шундай тартиб йўлга қўйилади.
Вилоят ҳокими, шунингдек, ҳар бир туман ва шаҳарга бориб, фуқароларни қабул қилишда фуқаро муаммосига жавобгар масъул — хоҳ у ҳоким, хоҳ вилоятдаги ташкилот, бошқарма бошлиғи узоқроқда бўлса ҳам Zoom орқали қабулга боғланиб, ечими ҳақида ўзи маълумот беришини таъкидлаган.
«Бундай тартибда ишлашдан мақсад ҳокимларни сергакликка чақириш ва вилоят ҳокимлигига қабул учун келиб келаётган фуқароларни мониторинг қилиш ҳисобланади. Куни кеча 20 нафар мурожаатчи келиб, ‘бизга арзонлаштирилган уй-жой беринг’, деяпти. Уларни қабул қилиб, уй-жой бериш масаласи ҳокимлик зиммасидан олинганини, арзон уй-жой харидига фалончи ташкилот масъул деб йўл-йўриқ кўрсатдик. Фуқаро ‘туманда бизга шуни тушунтирмаган-да’, деб чиқиб кетяпти. Кўряпсизми, фуқарога бир оғиз тўғри гапни, маслаҳатни бермайдиган раҳбарлар ҳам бор. Мен натижага эришиш учун бундан бошқа йўлни кўрмаяпман», — деган вилоят раҳбари.
Изоҳ (0)