Facebook ijtimoiy tarmog‘ida M.M. nomli profili ostida Korrupsiyaga qarshi kurashish agentligi xodimi sifatida barchaga o‘zini tanishtirib, aldov yo‘li bilan noqonuniy daromad qilayotgan shaxs qo‘lga olindi. Bu haqda Korrupsiyaga qarshi kurashish agentligi ma’lum qildi.
Dastlab bunday firibgarlikdan jabrlangan fuqaro N.S. tomonidan agentlik direktori nomiga ariza bilan murojaat qilinib, unga nisbatan qonuniy jazo ko‘rilishi so‘ralgan.
Holat o‘rganilganda fuqaro M.M. o‘zini agentlik xodimi sifatida tanishtirib, ariza muallifiga avtomashina va uy olib berishni va’da qilgan va undan 11 000 AQSh dollarini aldov yo‘li bilan olgani ma’lum bo‘ldi.
Keltirib o‘tilgan holat yuzasidan Yakkasaroy tumani IIO FMB tomonidan M.M.ga Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari olib borilmoqda.
M.M. agentlik tomonidan o‘tkazilgan rasmiy tadbirlarda boshqa fuqarolar qatorida ishtirok etib, ushbu tadbirlar yuzasidan internet tarmog‘ida berib borilayotgan foto va video lavhalarni o‘ziga saqlab olgan.
Mazkur ma’lumotlarni atrofidagilarga ko‘rsatish orqali o‘zini agentlik xodimi ekanligiga ishontirishga harakat qilib kelgan. Shuningdek, u Facebook ijtimoiy tarmog‘ida profil ochib, o‘zining agentlikdagi ish faoliyati to‘g‘risida yolg‘on ma’lumotlarni joylashtirib kelgan.
Ushbu shaxsning firibgarlik tuzog‘iga tushib qolgan fuqarolar agentlikning (71)202-04-02 (316) yoki Yakkasaroy tumani IIO FMBning (71)230-98-40 raqamiga murojaat qilishi mumkin.
Bundan avval Bo‘stonliqda bog‘dorchilik uchun ajratilgan 16 gektar yerni 5 mln dollarga sotishga uringan shaxslar qo‘lga olingani, Toshkent, Buxoro va Samarqandda fuqarolarni o‘qishga kiritish hamda o‘qishini ko‘chirib berish bilan shug‘ullanmoqchi bo‘lgan shaxslar ushlangani hamda Buxoroda internetdagi yutuqli o‘yinlar orqali fuqaroni chuv tushirgan shaxs qo‘lga olingani haqida xabar berilgandi.
Izoh (0)