O‘zbekiston Prezidenti Shavkat Mirziyoyev Tokio Olimpiadasida ishtirok etgan sportchilar, ularning ota-onalari va murabbiylari bilan uchrashdi. Ushbu uchrashuvda Prezident ko‘p yillar davomida sport gimnastikasi bilan shug‘ullanib, xalqaro miqyosda shuhrat qozongan gimnastikachisi Oksana Chusovitinaning xizmatlarini alohida hurmat bilan tilga oldi.
Oksana Aleksandrovnaning ishtiroki Tokio Olimpiadasining muhim voqeasi sifatida e’tirof etildi. Dunyo hamjamiyati Oksananing chiqishini katta zavq va hayajon bilan kuzatar ekan, Chusovitinaning matonatiga, o‘z ishiga bo‘lgan sadoqatiga tan berdi.Davlat rahbari ulkan xizmatlari uchun Oksana Chusovitinaga “O‘zbekiston Respublikasida xizmat ko‘rsatgan sport ustozi” faxriy unvoni berilganini ma’lum qildi.Hayotini sportga, bunday yirik musobaqada muvaffaqiyatga erishishdek maqsadga bag‘ishlash uchun zo‘r iroda va fidoyilik kerak, desak ayni haqiqatni aytgan bo‘lamiz.
Bunday afsonaviy sportchimiz bilan haqli ravishda faxrlanamiz. Uning mardligi, g‘alabaga bo‘lgan qat’iy intilishi yosh sportchilarimiz uchun muvaffaqiyat va shuhrat qozonishning o‘ziga xos ibrat maktabi bo‘lib xizmat qilmoqda.
Shavkat Mirziyoyev, O‘zbekiston Prezidenti
Prezident Oksana Chusovitina murabbiylik faoliyatini muvaffaqiyatli olib borib, sport gimnastikasi bo‘yicha yangi chempionlarni tarbiyalashga munosib hissa qo‘shishiga umid bildirdi.
Shu munosabat bilan Vazirlar Mahkamasiga Oksana Chusovitina va Bahodir Jalolovning sport mahorati maktabini tashkil etish va ularning faoliyati uchun barcha zarur sharoitlar yaratishga topshiriq berildi.
“Hurmatli Oksana Aleksandrovna, Vatanimizga bo‘lgan mehringiz va sadoqatingiz, sportdagi fidoyiligingiz, bukilmas iroda va matonatingiz uchun sizga yana bir bor katta minnatdorchilik bildiraman”, — dedi Prezident.
Ma’lumot uchun, Chusovitinaning ilk Olimpiadasi 1992-yilda Barselona shahrida o‘tgan. O‘shandan buyon u Olimpiya o‘yinlarida ketma-ket sakkiz marta ishtirok etgan va Ginnesning rekordlar kitobiga kiritilgan.
Oksana Chusovitina 2017-yilda “El-yurt hurmati” ordeni bilan, 2020-yilda esa 8-mart bayrami munosabati bilan “O‘zbekiston iftixori” faxriy unvoni bilan taqdirlangandi.
Izoh (0)