Toshkent viloyati Bo‘stonliq tumanida hokimlik tomonidan bog‘ barpo etish va obodonlashtirish uchun ijaraga berilgan yerni sotishga uringan shaxslar ushlandi. Bu haqda IIV JQBB korrupsiya va iqtisodiy jinoyatlarga qarshi kurashish boshqarmasi xabar berdi.
Ma’lum qilinishicha, 6-avgust kuni fuqaro X.S. Toshkent viloyati IIBBga ariza bilan murojaat qilib, unda o‘zlarini “Davron omad servis” MChJ ta’sischilari deb tanishtirgan shaxslar Bo‘stonliq tumani hokimining 2016-yil 16-maydagi qarori bilan bog‘ barpo etish va obodonlashtirish uchun mazkur jamiyatga 30 yilga ijaraga berilgan yerni sotishga urinayotganini bildirgan.
Ta’kidlanishicha, ushbu shaxslar tumanning “Bo‘stonliq” QFYda joylashgan 16 gektar yer maydonini 5 million dollarga sotishlarini, oldindan bo‘nak sifatida 200 ming dollar berishini talab qilgan.
Mazkur arizaga asosan, shu kuni Toshkent viloyati IIBB JQB korrupsiya va iqtisodiy jinoyatlarga qarshi kurashish bo‘limi, DXX Toshkent viloyati boshqarmasi hamda Bosh prokuratura huzuridagi Iqtisodiy jinoyatlarga qarshi kurashish departamenti Toshkent viloyati boshqarmasi xodimlari bilan hamkorlikda tezkor tadbir o‘tkazilgan. Tadbir davomida Toshkent shahar Yunusobod tumani Mustaqillik ko‘chasida joylashgan “Kredo” restoranida R.G. va D.J. ismli shaxslar ariza muallifidan 200 ming dollarni olgan vaqtida ashyoviy dalillar bilan ushlangan.
Mazkur holat yuzasidan shu kuni Bosh prokuratura huzuridagi Iqtisodiy jinoyatlarga qarshi kurashish departamenti Toshkent viloyati boshqarmasi tomonidan R.G. va D.J.ga nisbatan Jinoyat kodeksining 168-moddasi (firibgarlik) 4-qismi “a” bandi va 28/211-moddasi 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Avvalroq Sirdaryoda hokimlik zaxirasidagi 14 gektar yerni 30 ming dollar evaziga rasmiylashtirib berishga uringan ota-bola aniqlangani, Toshkent viloyatida 7 gektar yer olib berish uchun 23,5 ming dollar pora olgan shaxslar ushlangani, DXX Bo‘stonliqda ot sportiga ajratilgan 25,4 gektar yerni 1,5 mln dollarga sotmoqchi bo‘lgan shaxsni qo‘lga olgani to‘g‘risida xabar berilgandi.
Izoh (0)