Фаолияти мобайнида Лионель Месси билан ҳам, Криштиану Роналду билан ҳам ўйнаган футболчилар жуда кам, аммо Леонинг «ПСЖ»га ўтиши билан ушбу рўйхат яна бешта номга кўпайиши мумкин. Булар: Кейлор Навас, Ашраф Ҳакими, Данило Перейра, Пабло Сарабия ва Серхио Рамос. Ушбу футболчиларнинг ёки «Реал»да ё Португалия терма жамоасида Криштиану билан йўллари кесишган.
Қуйида замонамизнинг икки энг яхши даҳоси билан бирга тўп суриш бахтига муяссар бўлган барча футболчилар жамланди.
Фернандо Гаго
Аргентиналик ҳимоячи Криштиану билан 3 йил давомида «Реал»да ўйнаган бўлса, Месси билан Аргентина терма жамоаси шарафини ҳимоя қилган.
Габриел Ҳайнце
Ҳайнце Рони билан «Реал»да бирга ўйнаган, бироқ унгача уларнинг йўли «Манчестер Юнайтед»да ҳам кесишганди. Месси билан эса у худди Гаго сингари Аргентина терма жамоасида ҳаракат қилган.
Херард Пике
Пике «Манчестер Юнайтед»да ўз ўрнини тополмаган бўлса-да, Криштиану билан бир жамоада ўйнаш имкониятига эга бўлади. 2008—2021 йилларда эса у бошқа бир даҳонинг ёнида тўп сурган.
Андре Гомеш
Андре Гомешнинг трансферини «Барса» раҳбариятининг муваффақиятсиз юриши деб кўрсатиш мумкин: 46 учрашувда атиги 3 та гол. Гомеш «Барселона»да Месси билан ўйнаган бўлса, Португалия термасида Криш билан жамоадош бўлган.
Анхель ди Мария
Икки даҳо билан бирга ўйнаган энг ёрқин юлдузлардан бўлган ди Мария 2014 йилда Роналду билан биргаликда («Реал») Чемпионлар Лигасида ғолиб чиққан, 2021 йилда эса Месси бошчилигида Америка Кубогини қўлга киритди. «Ўзга сайёраликлар» билан иккита катта мусобақада ғалаба қозониш — камдан-кам учрайдиган ҳолат.
Карлос Тевес
Тевес «Манчестер Юнайтед»да Уэйн Руни ва Роналдудан иборат даҳшатли тандем билан бирга ишлаган бўлса, Месси билан икки марта Америка Кубоги финалига қадар етиб борган.
Пауло Дибала
Дибалага узоқ вақтдан бери Аргентина терма жамоасида Мессининг вориси сифатида қаралади. Пауло, шунингдек, Криштиану билан биргаликда икки марта А Серияда чемпиони бўлган.
Гонсало Игуаин
Гонсало Роналду билан биргаликда биратўла иккита клубда ўйнаган: «Реал» ва «Ювентус». Месси билан эса терма жамоада узоқ йиллик муносабатларга эга: улар биргаликда жуда кўп финалларни бой берган.
Ҳенрик Ларссон
Швециялик ҳужумчи бир мавсум давомида иккита даҳо билан ўйнашга ва совринлар қўлга киритишга муваффақ бўлади: аввал ёш Месси билан 2006 йилги Чемпионлар Лигасини қўлга киритади. 2007 йилда эса «Манчестер Юнайтед» сафида Криштиану билан Англия Премьер Лигасида ғолиб чиқади.
Нелсон Семеду
Португалиялик ўнг қанот ҳимоячиси Месси билан икки марта Ла Лигада, Роналду билан эса Миллатлар Лигаси—2019 да ғолиб бўлишга муваффақ бўлган.
Эсекиэль Гарай
Гарай «Реал»да икки мавсум ўтказган, ўшанда Криштиану жамоада ўйнарди. Аргентина терма жамоаси етакчиларидан бири мақомида эса Месси билан биргаликда ЖЧ—2014 финалига чиққан.
Деку
Португалиялик ярим ҳимоячининг «Барселона»даги даври Мессининг дастлабки йилларига тўғри келади. Криштиану билан эса у Португалия терма жамоаси шарафини ҳимоя қилган.
Мартин Касерес
Уругвайлик ҳимоячи ҳар икки юлдуз билан клуб даражасида ўйнаган саноқли футболчилардан бири ҳисобланади. У «Барселона»да Месси билан уч йил (2008—2011 йиллар) ўтказган, 2019 йилда эса «Ювентус»да Роналду билан жамоадош бўлган.
Миралем Пьянич
Босниялик ярим ҳимоячи худди Пауло Дибала сингари Роналду билан икки марта А Серия чемпиони бўлган, кейин эса Мессининг «Барселона»сига йўл олади. 2021 йилнинг ёзида у яна «Юве»га қайтиши ва Роналду билан бирлашиши мумкин.
Артур
Бразилиялик ярим ҳимоячи «Барса» сафида иккита яхши мавсум ўтказади, лекин 2020 йилнинг ёзида юқорида номи келтирилган Пьяничга алмаштирилади ва Туринга йўл олади. «Юве»да у ҳозирча жуда кам ўйнамоқда.
Францишку Тринкау
Ёш португалиялик ҳужумчи 2020 йилда «Брага»дан «Барса»га кўчиб ўтади ва Месси билан бир жамоада ўйнашга муваффақ бўлади. Худди шу йилнинг ўзида Францишку Португалия терма жамоасида дебют қилади ва Роналду билан елкама-елка тўп суради.
Изоҳ (0)