E-ijro auksion’da tadbirkorlarning radar o‘rnatishiga ruxsat beriladigan hududlar soni ortdi. Bu haqda onlayn-auksion ma’lumotlariga tayanib, Spot xabar berdi.
Hozirda ularning soni 344 tani tashkil etmoqda, iyun oxirida lotlar soni 72 ta edi. Toshkentda tadbirkorlarning radar va kamera o‘rnatishi mumkin bo‘lgan nuqtalari soni 39 taga yetgan. Eng ko‘pi Buxoro viloyatida bo‘lsa (62 ta), eng kami — Xorazmda (12 ta).
Barcha lotlar ushbu hududdagi avtomobillar oqimi va so‘nggi ikki yil davomidagi qoidabuzarliklar to‘g‘risidagi ma’lumotlar bilan keltirilgan. Shu orqali qoidabuzarliklar orqali qancha pul ishlab topish mumkinligini prognoz qilish mumkin.
Ta’kidlanishicha, tadbirkorlarni jalb etish orqali 2021—2022-yillarda mamlakat bo‘ylab 3356 ta videokamera va 763 ta radar o‘rnatish rejalashtirilgan.
Bu kabi lotlarga talab yuqori — savdolar davomida narxlar bir necha o‘n barobarga oshmoqda. Masalan, iyul oyida shu kabi hududlardan biri 40 million so‘mga sotilgan — bu boshlang‘ich narxidan 27 barobarga ko‘p demak.
Avvalroq O‘zbekistonda kamera va radarlarda qayd etilgan qoidabuzarliklardan davlat budjetiga 2020-yilda 724 milliard so‘m tushgani to‘g‘risida xabar berilgandi.
Eslatib o‘tamiz, 2021-yilning aprelida O‘zbekistonda qoidabuzarliklarni aniqlash uchun kameralarni o‘rnatish tartibi haqida hukumatning tegishli qarori qabul qilindi.Unga ko‘ra, maxsus avtomatlashtirilgan foto va video qayd etish dasturiy-texnik vositalari o‘rnatilishi mumkin bo‘lgan joylarning dislokatsiyasi ishlab chiqiladi hamda E-ijro auksion platformasi orqali onlayn auksionga qo‘yiladi. Tizim o‘rnatilishi mumkin bo‘lgan joy dislokatsiyasi, mazkur hududdagi transport oqimi va oxirgi 2 yilda aniqlangan qoidabuzarliklar to‘g‘risidagi ma’lumotlar ochiq e’lon qilinadi.
Iyun oyidan boshlab O‘zbekistondagi chorraha va yo‘llarda radar va kameralar qo‘yish joylari auksion orqali savdoga qo‘yilishi boshlandi. 1-iyul kuni E-auksion saytida birinchi bor Toshkent shahrida radar o‘rnatiladigan joylar auksionga chiqarildi.
Izoh (0)